Qasym-Jomart Toqaev: Qazaqstan sporttyq derjava retinde álemge tanyldy
- Qasym-Jomart Kemeluly, alda ústel tennısinen Astanada ótetin álemdik deńgeıdegi Grand Fınal saıysy kele jatyr. Qazaqstan tarapynyń aıtýly dodany ótkizýde daıyndyǵy qalaı?
- Atalǵan deńgeıdegi týrnırdi ótkizý - Qazaqstannyń ústel tennısi federatsııasy úshin úlken jetistik. Qazaqstan tek qana sportshylarymen ǵana emes, iri halyqaralyq saıystardy ótkizýge qaýqarly sporttyq derjava retinde tanylǵan memleket. Táýelsizdik alǵaly beri bizdiń elde ártúrli sport túrleri boıynsha álemdik deńgeıdegi saıystar uıymdastyrylǵan. Endigi kezekte ústel tennısiniń álemdik kartasynda Astana da oıyp turyp oryn alady. Qazaqstannyń ústel tennısi federatsııasyna úlken jaýapkershilik artylyp otyrǵanyn umytpaǵan abzal. Biz muny óte jaqsy túsinip otyrmyz. Federatsııa týrnırdi ótkizý boıynsha óte aýqymdy jumystardy atqardy. Grand Fınaldyń sátti nátıjesine úmittene otyryp, bul shara halyqaralyq BAQ-ta keńinen jarııalanar degen senimdemiz. Sonymen qatar, qazaqstandyq sheberler úshin bul álemdik deńgeıdegi sportshylardan tálim alýǵa keremet múmkindik bolyp otyr.
- Birneshe jyl boıy qazaqstandyq sportshylar álemdik dárejedegi ústel tennısiniń sańlaqtarymen júzbe-júz kórisip, oıynyn tamashalaýǵa múmkindik aldy. Al atalǵan sport túriniń Qazaqstanda damýy qaı deńgeıde?
- Ústel tennısi álemdegi buqaralyq turǵydan eń aýqymdy ári qoljetimdi sport túri. Qazaqstanda júıeli túrde ústel tennısin oınap júrgenderdiń sany 150 myń adamǵa jetedi. Qazirgi tańda kásibı túrde 5 myń sportshy ústel tennısin oınasa, olardy 200-ge jýyq jattyqtyrýshy baptap jatyr. Búgingi tańda biz álemdegi eń myqty degen Qytaı nemese Japonııa sekildi myqty memleketterdiń jetekshi sportshylarymen básekege túsemiz dep maqtana almaımyz. Biraq, bizdiń sportshylardyń úzdiktermen ıyq tirestirip, tájirıbe alý arqyly top jarýǵa tolyq múmkindigi bar.
- Federatsııa men sportshylar ózderiniń aldyna qandaı maqsat qoıyp otyr?
- Federatsııa aldynda elimizdegi buqaralyq sportty damytý mindeti tur. Biz eń aldymen balalar men jasóspirimderdiń jaıyna nazar aýdaramyz. Sebebi, bul sport ózgelerdeı jas býyndy salaýatty ómir saltyn saqtaýǵa shaqyrady. Búkil óńirlerde osy sport túrin damytý - negizgi mindetterdiń biri. Federatsııa qazirgi tańda Qazaqstannyń ústel tennısi boıynsha ulttyq quramasyn jasaqtaýmen aınalysýda. Jattyǵý protsesin uıymdastyrý baǵytynda úlken jumystar atqarylyp keledi. Ulttyq quramaǵa qaraǵandylyq belgili jattyqtyrýshy E.Álıeva jetekshilik etetin boldy. Biz sportshylardy sheberligin shyńdap, eńbekpen birge básekege qabiletti deńgeıge kóterilýge shaqyramyz. Federatsııa júıeli túrde jumysty júrgizetin bolsa alynbaıtyn asý joq. Kadrlyq qamtý turǵysynan quramany óńirlerdiń sportshylary tolyqtyryp jatyr.
- Siz óz sózińizde óńirlerde atalǵan sport túrin damytýǵa basa den qoıylyp otyrǵanyn atap óttińiz. Bul baǵytta naqty qandaı jumystar júrgizilip jatyr?
- Kúndelikti tártipte sportty damytýǵa basa mańyz berip otyrmyz. Barlyq óńirlerde ústel tennısimen aınalysýǵa bolatyndaı jaıly jaǵdaı jasalýy tıis. Bıylǵy jyly Federatsııa oblystyq fılıaldardaǵy jattyǵý zaldarynyń hal-ahýalyn tekserip qaıtty. Onda Federatsııa eń aldymen qurylǵylardyń jańarýyna den qoıdy. Sondyqtan, biz 100 kásibı ústel men 500 bólýshi tor satyp alyp, taratyp berdik. Quramanyń negizgi jattyǵý bazasy bolýmen birge, respýblıkalyq buqaralyq sharalardy ótkizetin Almatydaǵy sport zalda kúrdeli jóndeý jumystary júrgizildi. Qurylǵylar jańartylǵannan keıin balalar úıi men mektep-ınternattarynyń balalary arasynda «Pıng-pong hanshaıymy» atty ústel tennısinen respýblıkalyq saıys uıymdastyryldy. Oǵan elimizdiń barlyq óńirlerinen 60 oqýshy qatysty. Sonymen qatar, biz kásibı jattyqtyrýshy kadrlardyń bolýyna erekshe nazar aýdaramyz. Federatsııa qazirgi tańda jattyqtyrýshylardyń biliktiligin arttyrý mindetin ózine alyp otyr. Bul - bizdiń birinshi qadam. 14 jeltoqsan kúni Astana álemdik ústel tennısiniń ortalyǵyna aınalady. Sol sebepti, astanalyqtar men barlyq meımandardy osynaý aıtýly sharaǵa shaqyrǵym keledi. Bizdiń sportshy K.Gerasımenko úshin jankúıer bolaıyq.
- Kez kelgen sporttyń damýy adamnyń kóptep kelýine baılanysty tanymal bolady. El ishinde ústel tennısin tanymal ete túsý boıynsha sóılessek. Bul jumysty qalaı sheshýge bolady dep oılaısyz?
- Ústel tennısi - qymbat ekıpırovkany qajet etpeıtin álemdegi eń qoljetimdi sport túrleriniń biri. Atalǵan sportty tanymal ete túse otyryp, biz densaýlyǵy myqty ultty qalyptastyramyz, salaýatty ómir saltyn nasıhattaımyz. Astanada Grand Fınaldyń ótýi Qazaqstandaǵy ústel tennısin damytýǵa úlken serpin beretinine senimim kámil.