Qasym-Jomart Toqaev Qazaqstan boıynsha týrızm fakýltetterin ashýdy usyndy
ASTANA. QazAqparat - Parlament Senatynyń tóraǵasy Qasym-Jomart Toqaev daryndy jastarǵa jetkilikti deńgeıde qoldaý kórsetý máselesin kóterdi, dep habarlaıdy QazAqparat.
«Týrızm jastar arasyndaǵy kásipkerlikti damytý baǵytynda keleshegi zor salaǵa aınalady. Bizdiń elimizde ekologııalyq, sporttyq-saýyqtyrý jáne ekstremaldy týrızm salalaryn damytý úshin barlyq múmkindikter bar. Týrızm salasy boıynsha bilikti mamandardyń jetispeýshiligin eskere otyryp, elimizdiń joǵary oqý oryndarynda týrızm jáne qonaqúı bıznesi fakýltetterin keńinen ashý qajet», - dedi Q. Toqaev Parlament Senatynda jastar máselesine arnalǵan dóńgelek ústel otyrysynda.
Sonymen qatar ol ultymyzdyń zııatkerlik áleýetin nyǵaıtý - mańyzy aıryqsha mindetterdiń qatarynda ekenin atap ótti.
«Dúnıejúzine áıgili IT-kompanııalarda úlken jetistikterge jetken otandastarymyz da bar. Osyndaı bolashaǵy zor jas mamandar el ıgiligi úshin, ekonomıkamyzdy damytý jolynda qyzmet etýi qajet. Árıne, eń aldymen, biz olarǵa qajetti jaǵdaı jasaýǵa tıispiz. Daryndy jastarǵa jetkilikti deńgeıde qoldaý kórsetpeı, «aldyńǵy qatarly zııatker memleket» qataryna qosylý qıyn ekenin moıyndaýymyz kerek», - dedi Senat tóraǵasy.
Onyń paıymynsha, jastardy parlamenttiń jáne jergilikti ókiletti organdardyń jumysyna keńinen tartý qajet.
«Biz ózderiniń azamattyq kózqarasyn belsendi túrde bildire alatyn jáne ony tabandylyqpen qorǵaıtyn jańa býyn ókilderine qoldaý kórsetýimiz kerek. Alǵa qoıǵan maqsattaryna qol jetkizip, ózin-ózi damytýǵa talpynǵan jastarǵa shynaıy qoldaý qajet. Qazaqstandyq jastar óz bolashaqtaryna senimmen qaraýy tıis, olar úshin Qazaqstan memlekettik basqarýdan bastap ǵylym men shyǵarmashylyqqa deıin san alýan salalarda tabysqa jetýge mol múmkindikter beretin el bolýy tıis», - dedi Qasym-Jomart Toqaev.
