Qasym-Jomart Toqaev Qazaqstan-Amerıka ınvestıtsııalyq dóńgelek ústeliniń jumysyna qatysty

ASTANA. QazAqparat - Іsker toptarmen birqatar ekijaqty kezdesý aıaqtalǵannan keıin Memleket basshysy Qazaqstan-Amerıka ınvestıtsııalyq dóńgelek ústeliniń jumysyna qatysty, dep habarlaıdy QazAqparat BORT№1 Telegram kanalyna silteme jasap.

Іs-sharaǵa Chevron, ExxonMobil, Fluor, Shell USA, The Solar Turbines, S&P Global, Centrus Energy Corporation, Boeing, Amway, GE International Markets, Honeywell UOP, Philip Morris, The Procter & Gamble Company, Baker Hughes, John Deere, Bechtel, Halliburton, Valmont, Champion Foods, PepsiCo, MasterCard, Citi, McLarty Associates, Macro-Advisory LTD, private equity fund RCF, Brownstein Hyatt Farber Schreck, Greenenberg Traurig LLP, Microsoft, Coursera, StartX, EPAM, Wabtec Corporation, Zscaler, DoorDash, Amazon, Pfizer, Medtronic, Netflix sekildi iri amerıkalyq kompanııalardyń basshylary qatysty.

Prezıdent mundaı formatta ótken kezdesý ıgi dástúrge aınalǵanyn atap ótip, osy sharany uıymdastyrýǵa atsalysqan AQSh-tyń Saýda palatasy men Іskerlik keńes múshelerine rızashylyǵyn bildirdi.

Memleket basshysy kezdesýde Ádiletti Qazaqstan qurýǵa baǵyttalǵan aýqymdy saıası jáne ekonomıkalyq reformalardyń júzege asyrylýy jóninde egjeı-tegjeıli aıtyp berdi.

Qasym-Jomart Toqaev Qazaqstannyń ekonomıkalyq áleýeti men ınvestıtsııalyq tartymdylyǵyn arttyrý úshin qabyldanyp jatqan sharalar týraly jan-jaqty málimet berdi. Atap aıtqanda, Prezıdent energetıka, aýyl sharýashylyǵy, ónerkásip, kólik-logıstıka, tsıfrlandyrý, qarjy jáne jańartylatyn energııa kózderi salalaryndaǵy birlesken ınvestıtsııalyq jobalardy iske asyrý múmkindikterine toqtaldy.

Memleket basshysy Qazaqstanda amerıkalyq jańa iri kásiporyndardyń paıda bolýyna qoldaý bildirdi.

Qasym-Jomart Toqaev Qazaqstan men AQSh arasyndaǵy strategııalyq ekonomıkalyq seriktestik barlyq salada ártaraptandyrylyp, keńeıe beretinin atap ótti.

– Meniń komandamnyń ınvestıtsııa tartýdaǵy tájirıbesi mol. Bul kompanııalaryńyzǵa aımaqtyń eń jyldam damyp kele jatqan ekonomıkalarynyń birinde bıznes júrgizýdi jeńildetedi. Búgingi kezdesý saýda-ekonomıkalyq jáne ınvestıtsııalyq yntymaqtastyqty ilgeriletýde, sondaı-aq Qazaqstan men AQSh arasyndaǵy strategııalyq seriktestikti odan ári nyǵaıtýda naqty qadam bolady dep senemin, – dedi Qazaqstan Prezıdenti.

Osyǵan deıin QR Prezıdentiniń amerıkalyq iri kompanııalardyń basshylarymen birqatar kezdesý ótkizgeni habarlandy.