Qasym-Jomart Toqaev Kaspıı sammıtiniń mańyzy týraly aıtty

AShHABAD. QazAqparat – Óńirde bolǵan sońǵy jaǵdaılar Kaspıı teńiziniń mańyzyn arttyrdy. Bul týraly QR Prezıdenti Qasym-Jomart Toqaev altynshy Kaspıı sammıtinde aıtty, dep habarlaıdy QazAqparat tilshisi.

«Buryn-sońdy bolmaǵan jahandyq daýyl» jaǵdaıynda Kaspıı teńiziniń mańyzy artýda. Óıtkeni onyń geostrategııalyq ornalasý jaǵdaıy, tabıǵı resýrstarǵa baılyǵy, biregeı tasymal áleýeti tartymdy.

Aqtaý sammıti búkil álem qaýymdastyǵyna Kaspıı jaǵasyndaǵy elderdiń asa kúrdeli máselelerdi beıbit jolmen, tatý kórshilik qatynastar arqyly sheshe alatynyn kórsetti», - dedi Memleket basshysy.

Prezıdent Kaspıı teńiziniń quqyqtyq mártebesi týraly qujattyń bekitilýin sonyń aıǵaǵy retinde atady.

«Kóp jyldarǵa jalǵasqan kelissózderden keıin Kaspıı teńiziniń quqyqtyq mártebesi týraly konventsııaǵa qol qoıylýy osynyń aıqyn kýási. Bul qujat bes jaqty ara-baılanysty keshendi tereńdetýge irgetas bolady, - dedi Qasym-Jomart Toqaev.

Sonymen qatar Prezıdent kezdesýde Kaspıı teńiziniń quqyqtyq mártebesi týraly konventsııanyń tez arada kúshine engizý kezek kúttirmeıtin másele ekenin aıtty.

Eske salsaq, búgin Qazaqstan Prezıdenti Kaspıı mańy memleketteri basshylarynyń altynshy sammıtine qatysý úshin Ashhabad qalasyna jumys saparymen keldi.

Sapar aıasynda Qasym-Jomart Toqaev Túrikmenstan Prezıdenti Serdar Berdimuhamedovpen jáne Túrikmenstannyń burynǵy Prezıdenti, Halyq Máslıhaty Ulttyq keńesiniń tóraǵasy Gýrbangýly Berdimuhamedovpen kezdesti.