Qasym-Jomart Toqaev kásipkerlik salasyndaǵy basym mindetterdi atady

ASTANA. QazAqparat - Prezıdent Qasym-Jomart Toqaev kásipkerlik salasyndaǵy basym mindetterdi atady, dep habarlaıdy QazAqparat.

«Endi ýaqyt ozdyrmaı sheshýdi talap etetin basym mindetterge toqtalaıyn.BІRІNShІ. Zań ústemdigin jáne jeke menshiktiń qorǵalýyn qamtamasyz etý qajet.Bul – kásipkerlikti damytýdyń jáne ınvestıtsııa tartýdyń negizgi sharty. Alaıda ony múltiksiz saqtaý úshin júıedegi birqatar túıtkildi sheshý qajet.Máselen, baqylaýshy organdar men sottar zań buzýshylyqtyń formaldy belgilerin anyqtaǵan kezde, onyń mán-jaıyn tekserý qaǵıdatyn basshylyqqa almaıdy. Kásiporyn qyzmetindegi kez kelgen, tipti bolmashy qateliktiń ózi kóbine qylmys sııaqty qaralady. Nátıjesinde elimizdiń ekonomıkasy udaıy qylmystyq-quqyqtyq qysymǵa ushyraıdy«, - dedi Memleket basshysy.

Ol osy jıynǵa qatysyp otyrǵan quqyq qorǵaý organdarynyń basshylary bul máselege aıryqsha nazar aýdarǵany jón ekenin jetkizdi. Óıtkeni, bıznesten kúshtik qurylymdardyń áreketterine qatysty aryz-shaǵymdar tolassyz túsip jatyr.

«Qylmysqa, onyń ishinde ekonomıkalyq sıpattaǵy qylmysqa qarsy kúres tek qana zań aıasynda júrgizilýi kerek. Mundaı asyrasilteýshilik memlekettiń múddesine ǵana qaıshy kelmeıdi, sonymen qatar Qazaqstannyń abyroı-bedeline nuqsan keltirip, meniń bastamalaryma halyqtyń senimin azaıtady. Bizge qadaǵalaýdyń teńgerimdi mehanızmin qurý qajet. Men buǵan deıin árbir mańyzdy ınvestıtsııalyq jobanyń júzege asyrylýyn baqylaý úshin qadaǵalaýshy organnan bir qyzmetkerdi bekitý týraly bastama kóterdim. Alaıda bul máselede aıtarlyqtaı nátıje joq. Prezıdent Ákimshiligine Bas prokýratýramen jáne Bıznes-ombýdsmenmen birlese bir aıdyń ishinde tıisti usynys engizýdi tapsyramyn», - dedi Prezıdent.