Qasym-Jomart Toqaev Qaraǵandy óńirindegi birqatar avtojol qurylysy boıynsha tapsyrma berdi
«Qaraǵandy oblysy elimizdiń dál ortasynda ornalasqan. Ońtústik pen soltústikti jalǵaıtyn eń basty kúre jol osy óńirdi basyp ótedi. Aımaqty damytýǵa avtokólik joldarynyń sapasy aıryqsha yqpal etetini anyq.
Qazir Ortalyq – Ońtústik kólik dálizi salynyp jatyr. Balqash qalasy arqyly ótetin joldyń qurylysy óte baıaý júrip, merzimi qaıta-qaıta keıinge qalýda. Úkimetke «Qaraǵandy – Balqash» jáne «Balqash – Býrylbaıtal» tasjolyn kelesi jyly salyp bitirýdi tapsyramyn.
Sonymen birge, «Qaraǵandy – Jezqazǵan» kúre joly da asa mańyzdy. Uzyndyǵy 500 shaqyrymnan asatyn jol jóndelse, ortalyq óńirlerge barys-kelis jaqsarady. Júk tasymaly kóbeıedi. Bul Ulytaý oblysyn damytýǵa zor septigin tıgizedi. Eki oblystyń ınvestıtsııalyq jáne týrıstik múmkindigin arttyrady. Osy joldy jóndeý jumysyna aldaǵy jyly dereý kirisý kerek.
Sondaı-aq, «Qaraǵandy – Qarqaraly» tasjolyn jóndeýdi tapsyramyn. Qarqaralynyń týrıstik áleýetin arttyrý maqsatynda bul jumysty aldaǵy eki jyldyń ishinde aıaqtaý qajet», - dedi Q.Toqaev Qaraǵandy oblysynyń jurtshylyǵymen kezdesý barysynda.