Qasym-Jomart Toqaev qandaı vaktsına saldyrady
NUR-SULTAN. QazAqparat – QR Prezıdenti Qasym-Jomart Toqaev Qazaqstanda óndirilgen vaktsına saldyrady. Bul týraly «Habar 24» telearnasynyń «Suqbat» baǵdarlamasynda QR Prezıdentiniń baspasóz hatshysy Berik Ýálı aıtty, dep habarlaıdy QazAqparat tilshisi.
«Memleket basshysy qystaǵy joldaýlarynyń birinde qazaqstandyq vaktsınany saldyratynyn aıtyp, barlyq azamatty vaktsına alýǵa shaqyrǵan bolatyn. Jalpy saldyrý oıynda bar. Ol jaıynda der kezinde qulaǵdar bolasyzdar dep oılaımyn», - dedi ol.
Sonymen qatar Berik Ýálı óziniń de vaktsına saldyrý oıynda bar ekendigin aıtty.
«Ózderińiz bilesizder, byltyr elmen birge mende aýyrdym. 20 kúndeı aýrýhanada jatyp emdeldim. Onyń bes kúninde reanımatsııada jattym. Aýyr jaǵdaıdy ótkerdim. Qudaıǵa shúkir, otandyq medıtsınanyń arqasynda saýyǵyp shyqtym. Taıaýda antıdenemdi anyqtatqanymda 74 paıyz bar bolyp shyqty. Dárigerlerdiń paıymynsha, ol 30 paıyzdan tómendegende vaktsına saldyrýǵa bolady eken. Osy habarǵa kelerdiń aldynda Densaýlyq saqtaý mınıstri Alekseı Tsoımen keńeskenimde aýyryp turǵan adam 6 aıdan keıin vaktsına saldyrýǵa bolatyndyǵyn aıtty. Mende vaktsına saldyrsam dep otyrmyn. Otandyq vaktsına buıyrtsa sáýir aıynyń sońynda qoldanysqa engiziledi», - dedi ol.
Osy rette ol reseılik jáne qazaqstandyq vaktsınanyń qaısysyn saldyratyndyǵyn atady.
«Men otandyq vaktsınany saldyratyn shyǵarmyn. Óıtkeni, otandyq medıtsınany qoldaý úshin sony tańdap otyrmyn. Sonymen qatar barshańyzdy vaktsına saldyrýǵa shaqyramyn. Memleket basshysynyń ózi de birneshe ret halyqty vaktsına saldyrýǵa shaqyryp, indetten qutylýdyń jalǵyz joly vaktsına ekendigin aıtty. Shyn máninde búkil álem halqy saldyryp jatqannan keıin kertartpa pikirlerge ermeı, vaktsına saldyrý kerek», - dedi Berik Ýálı.
