Qasym-Jomart Toqaev indetke qarsy kúres jaıly: Jeńis bizde bolatynyna esh kúmán joq
NUR-SULTAN. QazAqparat – Memleket basshysy Qasym-Jomart Toqaev otandastarymyzdy halqymyzdyń basyna túsken synaq aldynda qaısarlyqqa, sabyr men jaýapkershilikke shaqyrdy, dep habarlaıdy QazAqparat tilshisi.
«Biz koronavırýsqa qarsy kúresti jalǵastyramyz. Jeńis bizde bolatynyna esh kúmán joq. Kúızeliske, nemquraılyqqa boı aldyrmaýymyz kerek. Búgin biz birligimizdi árdaıym kórsetýimiz kerek. Biz eshkimdi qıynshylyqqa qaldyrmaımyz jáne ár qazaqstandyqtyń ómiri men densaýlyǵy úshin kúresemiz. Biz – talaı zobalań men synaqty bastan ótkergen, tarıhtyń talaı daýylyna boı bermegen halyqpyz. Batyr babalardyń jolyn jalǵaǵan búgingi urpaq ta qazirgi qıyndyqqa tótep beredi dep senemin. Bálkim, bul bizdiń birligimizdi baıqaý úshin berilgen synaq shyǵar. Bir jeńnen qol, bir jaǵadan bas shyǵaryp, uıymdasa bilsek, bul synnan da ótermiz. «Densaýlyq – zor baılyq» degen halqymyzdyń dana sóziniń qadirin bileıik», - dedi Qasym-Jomart Toqaev elimizde qalyptasqan ahýalǵa baılanysty teleúndeýinde.
Qasym-Jomart Toqaev ár azamattyń amandyǵy úshin kúresýge shaqyrdy.
«Barshańyzǵa myqty densaýlyq, myzǵymas bereke-birlik tileımin!» - dep túıdi sózin Prezıdent.
