Qasym-Jomart Toqaev Ilham Álıevpen kelissózderdi joǵary baǵalady

ASTANA. QazAqparat – Qazaqstan men Ázerbaıjan saýda-ekonomıkalyq salada ózara tıimdi negizde yntymaqtasady. Bul týraly Aqordada Ázerbaıjan Prezıdenti Ilham Álıevpen kelissózderden keıingi birlesken málimdeme barysynda Memleket basshysy Qasym-Jomart Toqaev aıtty, habarlaıdy QazAqparat tilshisi.

«Búgin ótken tolyqformatty kelissózderdiń nátıjelerin joǵary baǵalaımyn. Bul ekijaqty baılanystardy jan-jaqty nyǵaıtýǵa degen ózara kózqarasymyzdy taǵy da rastady. Biz senimdi jaǵdaıda yntymaqtastyǵymyzdyń barlyq aspektisi boıynsha pikir almastyq. Eki eldiń ózara is-qımylyn odan ári tereńdetýdiń perspektıvalary men baǵyttaryn talqyladyq. Bizdiń ortaq kúsh-jigerimizdiń arqasynda Qazaqstan men Ázerbaıjan arasyndaǵy qarym-qatynas sońǵy jyldary odan da ashyq ári jan-jaqty sıpatqa ıe boldy. Saıası jáne saýda-ekonomıkalyq, mádenı-gýmanıtarlyq yntymaqtastyq jandandy», - dedi Memleket basshysy.

Prezıdent búgin qol qoıylǵan birqatar jańa kelisim eki eldiń kópqyrly seriktestigine tyń serpin beretindigin basa aıtty.

«Qazaqstan men Ázerbaıjan saýda-ekonomıkalyq salada ózara tıimdi negizde yntymaqtasady», - dedi Qasym-Jomart Toqaev.