Qasym-Jomart Toqaev Eýrazııalyq ıntegratsııanyń keleshegi týraly pikir bildirdi
«Mır» telearnasyna bergen suhbatynda Prezıdentke Nursultan Nazarbaevtyń biryńǵaı Eýrazııa ıdeıasyna 25 jyl tolǵany aıtylyp, EAEO keleshegi týraly suraq qoıyldy.
«Qazirgi álemdegi eń tájirıbeli saıasatker Nursultan Nazarbaevtyń eýrazııalyq ıntegratsııa bastamasy halyqaralyq qatynastardaǵy jahandyq syn-qaterlerge jaýap berdi. Eýrazııalyq ıntegratsııa tarıhı ólshem boıynsha qalyptasý men damýdyń qarqyndy jolynan ótti. Eýrazııalyq ekonomıkalyq odaq aıasynda yntymaqtastyǵymyzdyń kóptegen baǵyty boıynsha oń nátıjelerge qol jetkizdik. Azdaǵan jylda taýarlar men qyzmetterdiń, kapıtal men eńbek resýrsynyń biryńǵaı naryǵy qalyptasty. Kásiporyndardyń iskerlik belsendiligi artty. Óndiristik jáne saýda birlestikteri, birikken kásiporyndar qurylyp jatyr», - dedi Memleket basshysy.
Prezıdent ıntegratsııanyń klassıkalyq úlgisi boıynsha qurylǵan Eýrazııalyq ekonomıkalyq odaqtyń ózge memleketter úshin de tartymdy bolyp kele jatqanyn aıtty.
«Vetnam, Iran, Serbııamen saýda kelisimderi bekitildi. Mysyrmen jáne Úndistanmen dál osyndaı kelisim ornatý máseleleri sheshilip jatyr. Jaqynda ǵana EAEO quramyna baqylaýshy retinde Sıngapýr endi. Bizdiń Tuńǵysh Prezıdentimizge tıesili osynaý eńbekti eskere kele, Vladımır Vladımırovıch Pýtın Nursultan Ábishuly Nazarbaevqa Joǵarǵy Eýrazııalyq ekonomıkalyq keńestiń qurmetti tóraǵasy ataǵyn berdi. Muny keńestiń barlyq múshesi maquldady», - dep atap ótti Prezıdent.
Onyń aıtýynsha, eýrazııalyq memleketterdiń ıntegratsııasy bastamasynyń basty maqsaty - ekonomıkalyq jańǵyrý arqyly azamattardyń ómir súrý sapasyn kóterý.
«Bizdiń ekonomıkalarymyzdyń óńirlik jáne jahandyq ekonomıkalyq júıelerge birigýi - álemniń damyǵan elderi qataryna enýdiń basty mehanızmi. Bizdiń birlestik qatysýshylary ekonomıkalyq pragmatızmge, teńdik pen ózara tabysqa negizdelgen ıntegratsııalyq protseske jaqyn tásilderdi ustanady. Meniń túsinigimdegi Eýrazııalyq ekonomıkalyq odaq bolashaqta ınnovatsııalyq ekonomıkasy, damyǵan ónerkásibi, adamı kapıtaldyń joǵary deńgeıi bar qýatty ekonomıkalyq odaqqa aınalýy tıis. Árıne, bul - óte úlken maqsat jáne osyndaı úlken maqsattarǵa umtylýymyz qajet», - dedi Qasym-Jomart Toqaev.
