Qasym-Jomart Toqaev eńbekqorlyqty bala tárbıesine engizýdi usyndy

ULYTAÝ. QazAqparat – Eńbekqorlyq – Jańa Qazaqstannyń basty qundylyqtarynyń biri bolýy kerek. Bul týraly QR Prezıdenti Qasym-Jomart Toqaev Ulttyq quryltaıdyń alǵashqy otyrysynda aıtty, dep habarlaıdy QazAqparat tilshisi

«Álemde eńbekti básekelestik deńgeıine kótergen memleketter bar. Sonyń arqasynda olar sapaly ónimderimen jer júzin moıyndatyp otyr. Bul halyqtar óz urpaǵyn jas kezinen tyńbaı jumys isteýge baýlıdy. Solardyń tájirıbesin ózimizge beıimdep, bala tárbıesine engizý jaıyn qarastyrǵan jón», - dedi Prezıdent.

Memleket basshysy «Tolyq adam» uǵymy týraly da oı tolǵady.

«Halqymyz «Eńbek – yrystyń bulaǵy, baqyttyń shyraǵy» dep beker aıtpaǵan. Jańa Qazaqstanda eńbekqor adam eń syıly adam bolýǵa tıis. Biz óskeleń urpaqty adal eńbekke baýlyp, jahandyq naryqta básekege qabiletti etip tárbıeleýimiz qajet. Mańdaı termen tapqan ár tıyn – naǵyz ardyń isi, Abaı aıtqan «Tolyq adamnyń» eńbegi ekenin jastardyń sanasyna toqýymyz qajet», - dedi Qasym-Jomart Toqaev.

Aıta keteıik, Prezıdent Ulytaý oblysyna jumys sapary aıasynda Ulttyq quryltaıdyń alǵashqy otyrysyna qatysyp jatyr.

Keshe Memleket basshysynyń Ulttyq quryltaı qurý týraly Jarlyǵy jarııalandy.

Ulttyq quryltaıdyń qazirgi quramynda Májilis depýtattary men QHA múshelerinen, azamattyq qoǵam men saıası partııa ókilderinen, sarapshylar men óńirlerdegi qoǵamdyq keńes múshelerinen, kásipkerlerden jasaqtalǵan 117 adam bar.

Solardyń bir parasyn atasaq, aqyn Muhtar Shahanov, qazaqtyń tuńǵysh ǵaryshkeri Toqtar Áýbákirov, akademık Asqar Jumadildaev, ekonomıst Jaqsybek Kúlekeev, saıasatker Álıhan Báımenov, jýrnalıst, medıa-menedjer, qoǵam qaıratkeri Ermurat Bápı, Parlamenttiń birneshe shaqyrylymynyń depýtaty Nurtaı Sabılıanov, balýan Dáýlet Turlyhanov, ǵalym-bıotehnolog Kúnsulý Zakarııa, dintanýshy Qaırat Joldybaı, ǵalym Anar Fazyljanova sııaqty esimder bar.

Memlekettik keńesshi Erlan Qarınniń jazbasyna súıensek, keleshekte quryltaı jumysyna qatysýshylar aýystyrylyp otyrýy múmkin.