Qasym-Jomart Toqaev: Elimizde ǵylymı zertteýlerdi iske jaratyp, qoldanysqa engizetin óndiris óte az

ASTANA. QazAqparat - Ǵylym jáne tehnologııalar jónindegi ulttyq keńestiń otyrysynda Memleket basshysy Qasym-Jomart Toqaev elimizdegi ǵylym salasynyń basty problemasyn atady, dep habarlaıdy QazAqparat Aqordanyń baspasóz qyzmetine silteme jasap.

Prezıdenttiń sózinshe, elimizde myqty ǵylymı mektep bar. Bilikti ǵalymdarymyz da kóp. Memleket tarapynan ǵylymǵa jan-jaqty qoldaý kórsetilip jatyr.
Sońǵy jyldary bul salada birshama ózgeris boldy. Ǵylymdy qarjylandyrý tásilderi jaqsardy, qarjy kólemi edáýir artty. Ǵylymı mekemeler birtindep jańǵyrtylyp jatyr. Álemge áıgili ǵylymı ortalyqtarda tájirıbeden ótken mamandar sany kóbeıip keledi. Doktoranttardy daıarlaýǵa jáne ǵylymı jumyspen aınalysýǵa bólinetin grant sany artty. Jalpy, jastardyń ǵylymǵa degen qyzyǵýshylyǵy oıana bastady.
Memleket basshysy munyń bári jetkiliksiz ekenin atap ótti.

«Ashyǵyn aıtsaq, ǵylym salasy áleýmettik-ekonomıkalyq órkendeýge áli de tyń serpin bere almaı otyr. Qazaqstan basqa postkeńestik memleketter sekildi ǵylym damýynyń «mobılızatsııalyq model» paradıgmasynan shyǵa almaı qaldy.
Josparlaý men basqarýdyń shekten tys ortalyqtanǵan júıesi, memlekettik qarjylandyrýǵa tym táýeldi bolý, ǴZTKJ-ǵa bıznes tarapynan suranystyń az bolýy, kadr tapshylyǵy, ásirese jas mamandardyń ǵylymnan ketýi – osy modelge tán problemalar», - dedi QR Prezıdenti.
Odan bólek, Qasym-Jomart Toqaev elimizde ǵylymı zertteýlerdi iske jaratyp, qoldanysqa engizetin óndiris óte az ekenin aıtty.
«Qazirgi ahýaldy sıpattaý úshin myna máselelerge toqtalyp ótý qajet. Sońǵy bes jylda ǵylymǵa bólinetin qarjy 60 paıyzǵa artty. Al ishki jalpy ónimdegi ǵylymnyń úlesi, kerisinshe, 0,13 paıyzǵa tómendedi.
Bul qarajattyń basym bóligi, naqtyraq aıtsaq, 70 paıyzy bıýdjetten bólinedi. Sondaı-aq ǵylymnyń túrli salasyn qarjylandyrý isinde óte úlken teńsizdik bar. Qarajattyń 82 paıyzy irgeli jáne qoldanbaly ǵylymǵa jumsalady. Qalǵan 18 paıyzy ǵana tájirıbelik-konstrýktorlyq zertteýlerge arnalǵan.

Elimizde ǵylymı zertteýlerdi iske jaratyp, qoldanysqa engizetin óndiris óte az. Kásiporyndardyń 65 paıyzy shıkizat, metallýrgııa salasynda jumys isteıdi. Bul – úshinshi tehnologııalyq deńgeı degen sóz», - dedi Memleket basshysy.