Qasym-Jomart Toqaev «EKSPO-2017» kórmesine BUU-nyń nazar aýdarǵanyn joǵary baǵalady

ASTANA. QazAqparat - Búgin Parlament Senatynyń Tóraǵasy Qasym-Jomart Toqaev BUU Bas hatshysynyń kómekshisi, BUU Eýropa jáne TMD elderi jónindegi Damý baǵdarlamasy aımaqtyq bıýrosynyń dırektory, BUU-nyń «EKSPO-2017» kórmesindegi Bas komıssary Djıhan Sýltanoglýdy qabyldady, dep habarlaıdy QazAqparat Senat baspasóz qyzmetine silteme jasap.

Kezdesý barysynda Qasym-Jomart Toqaev aldaǵy halyqaralyq kórmege BUU-nyń múddelilik turǵysynda nazar aýdaryp otyrǵanyn joǵary baǵalady. «Kórmeniń 9 maýsymdaǵy ashylýyna BUU Bas hatshysy Antonıo Gýterrıshtiń qatysýy men 13 maýsymda BUU kúniniń uıymdastyrylýy BUU Ornyqty damý maqsattaryn iske asyrýǵa baǵyttalǵan kún tártibine halyqaralyq qoǵamdastyqtyń basa nazar aýdaryp otyrǵanyn kórsetedi», - dedi Senat Tóraǵasy.

Bunymen qosa, spıker «EKSPO-2017» kórmesindegi BUU kúnine ózi de qatysatynyn jetkizdi. Palata Tóraǵasy sonymen qatar, EKSPO bazasynda Jasyl tehnologııa men ınvestıtsııa ortalyǵyn qurý jónindegi Qazaqstan Prezıdentiniń bastamasyn dáıekti túrde qoldap kele jatqany úshin BUU Damý baǵdarlamasyna alǵys aıtty.