Qasym-Jomart Toqaev: EEK ókilettigin keńeıtý máselesi muqııattylyqty qajet etedi

NUR-SULTAN. QazAqparat – Qazaqstan Prezıdenti Qasym-Jomart Toqaev Eýrazııalyq ekonomıkalyq komıssııanyń ókilettigin keńeıtý máselesi muqııattylyqty qajet etetinin málimdedi, dep habarlaıdy QazAqparat tilshisi.

«Qyzmetterdiń saýdasy boıynsha EAEO-ǵa múshe memleketterdiń úshinshi eldermen ekijaqty kelissózderine Eýrazııalyq ekonomıkalyq komıssııany qatystyrýǵa quqyq berý týraly EEK-tiń ókilettigin keńeıtý máselesi - muqııattylyqty qajet etedi», - dedi Prezıdent Joǵarǵy Eýrazııalyq ekonomıkalyq keńestiń onlaın otyrysynda.

Memleket basshysy bul másele qosymsha zertteýdi talap etetinin aıtyp ótti.

«Shyn máninde, munyń is júzine qalaı iske asyrylatynyn elestetý qıyn: ekijaqty kelissózderge komıssııa ókili qatysyp otyrady. Qyzmetterdi saýdalaý salasynda ınvestıtsııalar – ulttyq quzirettilikke jatady. Sebebi ol basqa elderdiń múddelerine qaıshy kelmeıdi. Tıisinshe, bul jumysqa komıssııanyń adamı jáne qarjylyq resýrstaryn tartý – ashyǵyn aıtqanda bizge túsiniksiz. Eger taraptar úshinshi eldermen kelisimnen keıin EEK-ke aqparat berse, jekelegen jaǵdaılarda kelissózderge daıyndyq jumystaryna konsýltatsııalyq keńes surasa, kelissózge qajetti aqparatpen, tájirıbemen almassa – másele basqa», - dedi Q.Toqaev.