Qasym-Jomart Toqaev: EAEO strategııalyq qujaty memleket basshylary deńgeıinde talqylanýy kerek

NUR-SULTAN. QazAqparat –EAEO-ǵa múshe memleketter ekonomıkalyq odaqtyń aldaǵy bes jyldaǵy damý baǵyttaryn aıqyndaıtyn strategııalyq qujattardy qabyldaýda qatelik jiberilmeýi kerek. Bul týraly Qazaqstan Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Bul úlken oqıǵa. Qujattyń ózi bolsyn, uıymdastyrý-hattamalyq rásimdeý jumystary bolsyn - jan-jaqty taraptan muqııat daıarlyqty talap etedi. Komıssııa ókilderi jaqynda memleket basshylarynyń strategııany qabyldaǵany jaıly ańdatpa bergenin atap ótkim keledi. Prezıdentterge talqylaýǵa, bul mańyzdy qujatty - strategııany qabyldaımyz ba, joq pa – sheshimdi ózimizge qabyldaýǵa múmkindik berý kerek dep esepteımin. Alaıda keıde Eýrazııalyq ekonomıkalyq komıssııasynyń keıbir ókilderiniń erekshe ataqqumarlyǵy baıqalyp qalady. «Biz daıyndap qoıdyq, Prezıdentter qabyldaýy kerek» degendeı emeýrin bar. Biraq meniń oıymsha Memleket basshylary óz quqyǵyn qoldanyp, qatelik jibermeý úshin qujatty talqylaýy kerek dep esepteımin», - dedi Prezıdent Joǵary Eýrazııalyq ekonomıkalyq keńestiń otyrysynda.

Qasym-Jomart Toqaev memleketterdiń úkimetteri komıssııamen birlesip jumys júrgize beretindigin jetkizdi.

«Sonymen birge bizdiń memleketterdiń úkimetteri komıssııamen birge strategııany júzege asyrý josparyn daıarlaý boıynsha parallel jumysty júrgize berer edi. Bul kókjıekterdi keshendi túrde kóre bilýge múmkindik beredi», - dedi ol.

Eske sala ketsek buǵan deıin Qasym-Jomart Toqaev Eýrazııalyq ekonomıkalyq ıntegratsııanyń 2025 jylǵa deıingi strategııalyq baǵyttaryn qosymsha talqylaý qajettigin aıtqan bolatyn.