Qasym-Jomart Toqaev dıplomatııalyq korpýstyń ókilderin qabyldady
ASTANA. QazAqparat - Parlament Senatynyń tóraǵasy Qasym-Jomart Toqaev Qyrǵyzstan, Túrikmenstan, Armenııa jáne Japonııa elderiniń Qazaqstandaǵy elshilerin olardyń ótinishteri boıynsha qabyldady, dep habarlaıdy QazAqparat tilshisi.
«Senat tóraǵasy Armenııanyń Qazaqstandaǵy jańa elshisi Gagık Galachıandy qabyldaý barysynda Armenııanyń kezekten tys parlamenttik saılaýdy tabysty ótkizýimen quttyqtady jáne bizdiń elderimizdiń zań shyǵarý organdary arasyndaǵy dostyq qatynastardy jalǵastyrýǵa yqylasty ekenin jetkizdi», - dep atap ótilgen Senattyń baspasóz qyzmetiniń habarlamasynda.
Senat tóraǵasynyń aıtýynsha, Qazaqstanda armıan memleketi men onyń halqyna, mádenıeti men salt-dástúrine jyly shyraıly kózqarasty berik ustanady. Qazaq jáne armıan halyqtary arasynda ejelden dostyq dástúri qalyptasqan, sondyqtan, Parlamentiń joǵarǵy Palatasynyń Tóraǵasy ǵasyrlar qoınaýyna ketetin mádenı baılanystar men yntymaqtastyqty zertteý jumystarynyń mańyzy zor dep sanaıdy. Q.Toqaev Qazaqstan men Armenııanyń EQYU men EAEO-daǵy, sondaı-aq basqa da halyqaralyq uıymdardaǵy ózara is-qımyly basymdyqqa ıe ekenin atap ótti.
Q.Toqaev Qyrǵyzstan elshisi Jeenbek Kýlýbaevpen kezdesý barysynda Qazaqstan men Qyrǵyzstannyń zań shyǵarý organdarynyń TMD Parlamentaralyq Assambleıasy, UQShU Parlamenttik Assambleıasy men EQYU Parlamenttik Assambleıasy aıasyndaǵy tyǵyz yntymaqtastyǵyn joǵary baǵalady. Senat Tóraǵasy saýda-ekonomıkalyq jáne mádenı-gýmanıtarlyq yntymaqtastyqty odan ári nyǵaıtýdyń mańyzdylyǵyn atap ótti. Kezdesýge qatysýshylar aımaqtaǵy, onyń ishinde ejelgi Jibek joly aıasyndaǵy týrıstik baǵyttardy odan ári damytý múmkindikteri týraly pikir almasty.
Budan bólek, Qasym-Jomart Toqaev pen Túrikmenstannyń Elshisi Toıly Kómekov eki jaqty kún tártibindegi aýqymdy máseleler boıynsha pikir almasty. Senat Tóraǵasy 2018 jyldyń tamyz aıynda Kaspıı teńiziniń quqyqtyq mártebesi týraly konventsııaǵa Aqtaýda qol qoıylýy negizinen eki eldiń tıisti mekemeleriniń ózara nátıjeli yntymaqtastyǵynyń kórinisi dep sanaıdy. Kaspıı mańy memleketteriniń ekijaqty jáne kópjaqty sıpattaǵy saıası, saýda-ekonomıkalyq jáne gýmanıtarlyq yntymaqtastyqty damytýǵa jańa múmkindikter ashatyn bul qujatty Qazaqstan men Túrikmenstan parlamentteri ratıfıkatsııalaǵan bolatyn.
Munymen qosa, Q.Toqaev Japonııanyń Elshisi Tatsýhıko Kasaıdy Astanadaǵy jumysynyń bastalýymen quttyqtady jáne onyń qyzmeti saıası únqatysýdy odan ári ilgeriletýge, saýda-ekonomıkalyq jáne ınvestıtsııalyq qatynastarǵa qarqyn qosýǵa eleýli úles qosatynyna senim bildirdi. Senat Tóraǵasy Prezıdent N.Nazarbaevtyń 2016 jyly Japonııaǵa jasaǵan saparynyń qorytyndylary jónindegi Deklaratsııada bizdiń elderimizdiń basshylary ekijaqty qatynastardy jańa sapalyq deńgeıdegi keńeıtilgen strategııalyq áriptestikke shyǵarýdy naqtylaǵanyn eske saldy. Qazaqstan men Japonııada jer júzinde ıadrolyq qarýdy taratpaý salasyndaǵy yntymaqtastyqtyń mol tájirıbesi jınaqtaldy. Júzdesýshiler parlamentaralyq únqatysýdy odan ári damytý múmkindikterin de talqylady.
