Qasym-Jomart Toqaev bılikke jańa kadrlar kerektigin aıtty
«Qazir sapaly jańa mindetterdi oryndaý úshin kadrlardy irkteý barynsha mańyzdy mindetke aınalady. Jańa baǵdar bilimdi, tabandy, bastamashyl, isker ári adal jańa oryndaýshylardy kózdeıdi», - dedi QR Prezıdenti.
Osy rette Memleket basshysy búgingi Úkimet otyrysyna qatysqandar joǵaryda atalǵan krıterıılerge saı kelý-kelmeýin oılaýy qajettigin aıtty.
«Endi oılanyńyzdar: Osy jerde otyrǵan komanda atalǵan krıterıılerge saı ma. Úkimet músheleri, ákimder ózderiniń múmkindikterin parasatty túrde baǵalaıdy dep oılaımyn. Degenmen, bizde ózin-ózi synaý jáne memleket paıdasy úshin sheshim qabyldaý qıyndaý», - dedi Qasym-Jomart Toqaev.
Aıta keteıik, vıdeobaılanys arqyly ótip jatqan jıynda Úkimet 2020 jyldyń alǵashqy jarty jyldyǵyndaǵy elimizdiń áleýmettik-ekonomıkalyq damý qorytyndysy týraly esep berdi. Sondaı-aq koronavırýsqa qarsy kúreske qatysty qabyldanǵan sharalar, Memleket basshysynyń Úkimettiń aldaǵy ýaqytta atqaratyn jumysynyń negizgi baǵyttary boıynsha bergen tapsyrmalary men mindetteri qarastyryldy.
Elimizdiń áleýmettik-ekonomıkalyq damýynyń qorytyndylary men jyl sońyna deıin oryndaıtyn mindetter jóninde Premer-Mınıstr Asqar Mamın, aqsha-nesıe saıasatyna qatysty sharalar týraly Ulttyq banktiń tóraǵasy Erbolat Dosaev, elimizdegi epıdemıologııalyq ahýaldy jaqsartý jónindegi sharalar týraly Densaýlyq saqtaý mınıstri Alekseı Tsoı baıandama jasady.
