Qasym-Jomart Toqaev: BǴM úshtildi oqytý júıesin engizý úderisin qaıta qarasyn
Іs-sharaǵa Qazaqstannyń barlyq óńirinen kelgen muǵalimder, oqý oryndarynyń oqytýshylary, ǵalymdar, qoǵam qaıratkerleri, memlekettik organdardyń ókilderi qatysty.
Qasym-Jomart Toqaev óz sózinde jańa býyndy tárbıeleýdegi muǵalimderdiń rólin atap ótti.
– Elimizdiń laıyqty azamattaryn tárbıeleý – pedagogtardyń jáne ata-analardyń mindeti. Laıyqty azamat – bul óz bilimin Otanymyzdyń ıgiligi úshin jumsaıtyn adam. Aldymyzda turǵan qubylmaly zamanda jastarymyz eńbekqor bolmasa, eshqandaı básekege túse almaıtynyn tereń túsinýi kerek, – dedi Prezıdent.
Memleket basshysynyń aıtýynsha, bilim jáne ǵylym salasynyń damýyna tyń ári tegeýrindi serpin qajet.
– Bilim sapasyn kóterý úshin keshendi sharalar qabyldaý qajet. Bul, aldymen, muǵalimderdiń biliktiligine, oqýlyqtardyń sapasyna, zaman talabyna saı ınfraqurylym men materıaldyq qorǵa baılanysty máseleler. Atalǵan baǵyttar boıynsha tıimdi jumys isteý qajet, ıaǵnı týyndaǵan máselelerdi der kezinde anyqtap, olardy sheshýdiń ońtaıly joldaryn usyný kerek, – dep málimdedi Qasym-Jomart Toqaev.
Prezıdent muǵalimderdiń biliktiligin baǵalaý ıdeıasyn júzege asyrýdaǵy bıýrokratııa men birjaqtylyqqa, sondaı-aq oqytýshylardyń óz kásibinen tys túrli is-sharalarǵa tartylýyna qatysty synı kózqarasyn bildirdi.
– Jergilikti ákimdikterdiń óz ókilettilikterin asyra paıdalanyp, muǵalimderdi bilim berý salasyna esh qatysy joq ákimshilik is-sharalarǵa tartý jaǵdaılary tolastamaı tur. Atalǵan máselelerdi sheshý úshin Úkimetke shuǵyl, naqty sharalar qabyldaýdy tapsyramyn, – dedi Memleket basshysy.
Sonymen qatar Qasym-Jomart Toqaev mektepke deıingi bilim berý jáne tárbıeleý júıesiniń sapasyn arttyrý, sondaı-aq orta bilim berýdi odan ári damytý strategııasyn aıqyndaý jóninde sharalar qabyldaýdy tapsyrdy.
– Álem elderiniń
60 paıyzynda mektepte bilim berý 6 jastan bastalady, ıaǵnı mundaı júıe balanyń
zııatkerlik jáne áleýmettik jaǵynan erterek damýyna oń yqpal etedi. Úkimetke
Bilim men ǵylymdy damytýdyń 2025 jylǵa deıingi jańa baǵdarlamasy aıasynda
12-jyldyq bilim berý modeline birtindep, josparly negizde kóshýdi qamtamasyz
etýdi tapsyramyn, – dep atap ótti Prezıdent.
Memleket basshysy «Jas maman» jobasynyń júzege asyrylýyn, tehnıkalyq jáne kásibı bilim berý júıesin damytý jumysyn pysyqtaý, sondaı-aq úsh aýysymdy jáne shaǵyn komplektili mektepter máselesin sheshý qajet ekenine nazar aýdardy.
Qasym-Jomart Toqaev Bilim jáne ǵylym mınıstrligine úshtildi oqytý júıesin engizý úderisin qaıta qaraýdy tapsyrdy. Atalǵan másele oqytýshylar men bilim berý baǵdarlamalarynyń daıyndyǵyn eskere otyryp, jan-jaqty zertteýdi qajet etedi.
– Jaratylystaný pánderin aǵylshyn tilinde oqytý bilim ortalyqtarynyń kadrlyq múmkindigine qaraı, oqýshylar men ata-analardyń qalaýy boıynsha iske asýy tıis. Sondyqtan, aǵylshyn tilin oqytýdy 2-3-shi synyptan nemese ata-analardyń qalaýyna qaraı 5-shi synyptan bastaý oryndy ári tıimdi bolady dep sanaımyn, – dep, Prezıdent óz ustanymyn jetkizdi.
Memleket basshysy muǵalimder jalaqysynyń mólsherin arttyrýdy aldyńǵy qatardaǵy mindet ekenin atap ótti.
– Bul saladaǵy eńbekaqy eń tómen jalaqylardyń qatarynda, ıaǵnı el ekonomıkasy boıynsha ortasha jalaqynyń 65 paıyzyn quraıdy. Bilim berý júıesine bilikti kadrlardy tartý maqsatynda Úkimetke tórt jyl ishinde muǵalimderdiń eńbekaqysyn 2 ese kóbeıtýdi tapsyramyn, – dedi Qasym-Jomart Toqaev.
Budan bólek, Prezıdent barlyq bilim berý baǵdarlamalary men standarttaryn bir deńgeıde ázirlep, qala jáne aýyl balalarynyń bilim deńgeıindegi alshaqtyqtardy joıýdy jáne turǵylyqty jeri men ata-analarynyń áleýmettik jaǵdaıyna qaramastan balalarǵa sapaly bilim alýǵa múmkindik berýdi tapsyrdy.
Memleket basshysy ǵylymdy qarjylandyrý júıesiniń ashyqtyǵyn qamtamasyz etý, ulttyq ǵylymı keńesterdiń jumysyn jetildirý qajettiligine basa mán berdi. Prezıdenttiń pikirinshe, ǵylymdy odan ári ınstıtýtsıonaldy damytý tujyrymdamasyn ázirleý qajet.
Konferentsııanyń sońynda Qasym-Jomart Toqaev otandyq bilim berý salasyn damytýǵa qosqan úlesi jáne belsendi qoǵamdyq qyzmeti úshin birqatar ustazdy marapattady.
Atap aıtqanda,
«Qurmet» ordenimen – Pavlodar qalasynyń
№8 daryndy balalarǵa arnalǵan mektep-lıtseıiniń muǵalimi Anatolıı Bılıda, Almaty
oblysy Іle aýdany №13 orta mektebiniń muǵalimi Gúlnár Kazerbaeva, «Eren eńbegi
úshin» medalimen – Oral qalasy
Á.Moldaǵulova atyndaǵy №38 mektep-lıtseıiniń muǵalimi Gúlzıhan Taskarına,
Túrkistan oblysy Kentaý qalasynyń A. ıÝgnakı atyndaǵy orta mektebiniń muǵalimi
Dánegúl Qýatbek, «Shapaǵat» medalimen – Qaraǵandy qalasyndaǵy N.Nurmaqov
atyndaǵy №2 oblystyq mamandandyrylǵan mektep-ınternatynyń muǵalimi Ekaterına
Nıprýk marapattaldy.
Memleket basshysynyń baıandamasynyń tolyq nusqasyn myna jerden oqýǵa bolady.
