Qasym-Jomart Toqaev Batys Qazaqstan oblysynyń belsendi jastarymen kezdesti
Prezıdentpen júzdesken jastar ózderiniń jetistikteri týraly aıtty. Bórli aýdany Ýspen eldi mekenindegi mektep-balabaqsha kesheniniń dırektory Asylhan Qarmysov qalada bilim alǵanymen, aýyldy kórkeıtý úshin týǵan jerine oralyp, eńbek etip jatqanyn jetkizdi.
Aqsaı qalasyndaǵy №5 mekteptiń 9-synyp oqýshysy Anastasııa Zolotar – qazaq tili men ádebıeti boıynsha ótken birneshe respýblıkalyq baıqaýdyń jeńimpazy. Ol Qazaqstan sekildi bolashaǵy jarqyn elde dúnıege kelip, bilim alyp jatqanyna qýanyshty ekenin atap ótti.
Túrkistan oblysynyń týmasy Dıer Nýrýllaev Mahambet Ótemisov atyndaǵy Batys Qazaqstan memlekettik ýnıversıtetinde «Serpin» baǵdarlamasy boıynsha joǵary bilim alǵan. Qazir Aqsaı qalasynyń №4 orta mektebinde fızıka páninen sabaq beredi. Ol Memleket basshysynan monoqalalardy damytý baǵdarlamasynda jas mamandardy baspanamen qamtamasyz etý múmkindigin qarastyrýdy surady.
Kásipker Krıstına Omelıashko Prezıdentke «Bıznes bastaý» baǵdarlamasymen grant alyp, óziniń súıikti isin tabysty kásipke aınaldyrǵany jóninde aıtyp berdi. Krıstınanyń qolynan shyqqan toqyma buıymdardy jergilikti turǵyndar ǵana emes, sheteldikter de satyp alady.
Prezıdent elimizdiń bolashaǵy óskeleń urpaqtyń qolynda ekenine toqtalyp, memleket eńbekqor jastarǵa, olardyń ıdeıalary men usynystaryna árqashan qoldaý kórsetetinin aıtty. Sondaı-aq Qasym-Jomart Toqaev daryndy jastarǵa jol ashý kerek ekenin jetkizdi.
Sonymen qatar Prezıdent Aqsaıǵa osydan 23 jyl buryn kelgenin eske alyp, qazir qalanyń kórkeıgenin, kósheleri uqypty, taza ekenin atap ótti.
Aqsaı qalasyndaǵy Jastar resýrstyq ortalyǵy jergilikti turǵyndarǵa birneshe baǵyt boıynsha qyzmet kórsetedi. Atap aıtqanda, ortalyqta «Bolashaq» kovorkıng alańy, «Aıala» qaıyrymdylyq dúkeni jumys isteıdi. NEET sanatyndaǵy jastardy jumysqa ornalastyrýmen aınalysatyn Jastarǵa qyzmet kórsetý ortalyǵy da bar. Ortalyq mamandary jasóspirimderge, ómirde túrli qıyndyqqa tap bolǵan jandarǵa psıhologııalyq kómek kórsetedi.
