Qasym-Jomart Toqaev Bas ashkenazı men sefard ravvınderin qabyldady

NUR-SULTAN. QazAqparat - Memleket basshysy Qasym-Jomart Toqaev Bas ashkenazı ravvıni Davıd Laý men Bas sefard ravvıni Itshak Iosıfti qabyldady, dep habarlaıdy Aqorda.

Prezıdent Álemdik jáne dástúrli dinder kóshbasshylarynyń VII sezine qatysqany, sondaı-aq Qazaqstannyń bul bastamasyn belsendi qoldaǵany úshin ashkenazı jáne sefard ravvınattarynyń bedeldi basshylaryna alǵys aıtty.

Qasym-Jomart Toqaev bizdiń elimizdi uzaq tarıhı kezeńde qalyptasqan dinı jáne mádenı áralýandylyq erekshelendirgenin atap ótti. Qazaqstan aýmaǵynda iri álemdik jáne dástúrli dinderdiń, sonyń ishinde ıýdaızmniń rýhanı dástúrleri toǵysqan. Memleket basshysynyń aıtýynsha, Qazaqstan konfessııaaralyq jáne etnosaralyq kelisimdi nyǵaıtý baǵytynda dáıekti saıasat júrgizip keledi.

Memleket basshysy Izraıl Qazaqstannyń Taıaý Shyǵystaǵy mańyzdy seriktesi ekenin atap ótti, sondaı-aq saýda-ekonomıkalyq is-áreketter jandanyp, mádenı-rýhanı baılanystar dáıekti túrde nyǵaıyp kele jatqanyn aıtty. Davıd Laý men Itshak Iosıf Qazaqstannyń konfessııaaralyq dıalogty nyǵaıtýǵa beıildi ekenine, árdaıym dinı senim bostandyǵyn qoldaıtynyna nazar aýdaryp, bul salada ózge memleketterge úlgi bolatynyn jetkizdi.

Foto: akorda.kz