Qasym-Jomart Toqaev Azııa aımaǵynyń áleýetine baılanysty pikir bildirdi
«Meniń kásibı mansabym Azııa aımaǵymen tikeleı baılanysty boldy, ıaǵnı osy aýmaqta uzaq ýaqyt oqýda boldym ári qyzmet ettim. Sonda osy ejelgi, erekshe ári uly mádenıetke jáne órkenıetke shynaıy qurmetpen qaradym. Sondyqtan Azııa óńiri jáne onymen baılanysty barlyq jaǵdaı meniń tyńǵylyqty nazarymda. Sonymen qatar, halyqaralyq sarapshylar Azııa ǵasyrynyń kelgenin moıyndady», - dedi Prezıdent «Mır» telearnasyna bergen suhbatynda.
Osy oraıda Memleket basshysy Azııa aımaǵynda iri ulttyq ekonomıkalar ornalasqanyn, Azııa elderi halyqaralyq saýda men tehnologııalyq revolıýtsııany, ınvestıtsııany yntalandyryp otyrǵandyǵyndyǵyn atap ótti.
Sonymen qatar Qasym-Jomart Toqaev Azııa-Tynyq muhıty aımaǵyndaǵy jaǵdaıǵa pikir bildirdi. Jahandyq oıynshylar arasyndaǵy básekelestik, tarıhtyń kúrdeli kezeńderin túsindirý men shekaralar aınalasyndaǵy daýlar, sondaı-aq qazirgi álemdegi pandemııanyń taralý qaýpi men osy indettiń keri saldary jáne ózge de faktorlar turaqsyz kontınentaldyq qarqyndy qalyptastyryp jatyr.
Ózara senimniń jetispeýiniń jarqyn úlgisi retinde saýda, valıýta ári tehnologııalyq máseleler boıynsha qytaılyq-amerıkalyq daýlardy atap ótýge bolady. Bul ahýal Qytaı men AQSh arasyndaǵy geosaıası qatynastar sapasyna, aımaqtyq qaýpsizdik máselelerine jáne basqa da salalarǵa tikeleı áser etedi.
Osy oraıda Memleket basshysy Qazaqstannyń únemi aldyn alý doplomatııasyn ustanyp kelgenin jáne bul ustanymdy jalǵastyratynyn atap ótti.
«Shyǵysta tıimdi qaýipsizdik arhıtektýrasyn qurý Batyspen ózara is-qımylsyz múmkin emes ekeni anyq. Qazaqstan birneshe márte Azııadaǵy ózara is-qımyl jáne senim sharalary jónindegi keńes pen EQYU arasynda ózara árekettesýdi retteýdi usyndy, ıaǵnı bul qadam ıgi ister úshin qos forýmnyń áleýetin paıdalanýǵa kerek», - dedi Qasym-Jomart Toqaev.
Sóz sońynda Prezıdent Qazaqstan árbir eldiń ulttyq egemendigin qurmetteýdi, daýlardy beıbit jolmen sheshýdi basty nazarǵa alatynyn qadap aıtty.