Qasym-Jomart Toqaev azamattardyń qansha qoldaý qolyn jınady

NUR-SULTAN. QazAqparat - QR Prezıdenttigine kandıdat Qasym-Jomart Toqaevty qoldap 313 myńnan astam azamat qol qoıǵan. Bul týraly búgin QR Ortalyq saılaý komıssııasynyń otyrysynda komıssııa hatshysy Sábıla Mustafına aıtty, dep habarlaıdy QazAqparat tilshisi.

«Ortalyq saılaý komıssııasyna kandıdatty tirkeý úshin mynadaı qujattar: Prezıdenttikke kandıdat Qasym-Jomart Kemeluly Toqaevtyń kiristeri men múlki jóninde deklaratsııa tapsyrǵany týraly Memlekettik kirister organynyń anyqtamasy; Prezıdenttikke kandıdat Qasym-Jomart Kemeluly Toqaevtyń ony tirkeýge kedergi keltiretin aýrýlardyń joqtyǵy týraly medıtsınalyq qorytyndy; oblystardyń, respýblıkalyq mańyzy bar qalalardyń jáne Qazaqstan Respýblıkasy astanasynyń aýmaqtyq saılaý komıssııalarynyń Prezıdenttikke kandıdat Qasym-Jomart Kemeluly Toqaevtyń qoldaýyna azamattardyń jınalǵan qoldaryn tekserý nátıjeleri týraly hattamalary - usynyldy», - dedi ol.

Onyń atap ótýinshe, osy hattamalarǵa sáıkes Prezıdenttikke úmitker Qasym-Jomart Kemeluly Toqaevtyń qoldaýyna Qazaqstannyń barlyq 17 óńirinen 315 910 azamattyń qoly jınaldy. Olardyń 313 653-i durys dep tanyldy.

«Bul rette Ortalyq saılaý komıssııasynyń 2019 jylǵy 15 sáýirdegi № 13/237 qaýlysymen belgilengen Qazaqstan Respýblıkasy Prezıdenttigine kandıdatty qoldaý úshin durys qoldardyń qajetti sany keminde 118 140 qoldy quraıdy. Qasym-Jomart Kemeluly Toqaevty Prezıdenttikke kandıdat retinde tirkeýge qajetti barlyq qujattar Ortalyq saılaý komıssııasyna usynyldy jáne olarǵa qoıylatyn talaptarǵa tolyq sáıkes keledi», - dedi ol.

Buǵan deıin Ortalyq saılaý komssııasy Prezıdent saılaýyna kandıdat retinde Qasym-Jomart Toqaevty tirkegendigin habarlaǵan edik.