Qasym-Jomart Toqaev Aıbek Nuǵymarovty týǵan kúnimen quttyqtady
ÓSKEMEN. QazAqparat - QR Prezıdenti Qasym-Jomart Toqaev qazaq kúresinen tórt dúrkin álem chempıony Aıbek Nuǵymarovty týǵan kúnimen quttyqtady, dep habarlaıdy QazAqparat tilshisi.
Belgili balýan, «Qazaqstan barysy» Aıbek Nuǵymarov 3 maýsym kúni 32-ge tolǵan bolatyn. Osyǵan oraı Memleket basshysy Qasym-Jomart Toqaev sportshyǵa quttyqtaý hat joldady.
«Qurmetti Aıbek Serikboluly! Sizdi týǵan kúnińizben quttyqtaımyn. Elimizde sport salasynyń damýyna, onyń ishinde qazaq kúresiniń álemdik deńgeıge kóterilýine eleýli eńbek sińirip, halqymyzdyń yqylasy men qurmetine bólenip kelesiz. Aldaǵy ýaqytta josparlaǵan arman-maqsattaryńyzǵa jete berýińizge tilektestigimdi bildiremin. Sizge zor densaýlyq, uzaq ǵumyr men baq-bereke tileımin», - delingen quttyqtaý hatta.
Qazir Aıbek Nuǵymarov «Qazaqstan barysy» respýblıkalyq jarysyna daıyndalyp jatyr. Eske salsaq, ol báseke 8 maýsym kúni Nur-Sultan qalasynda ótedi. Ony «Qazaqstan» jáne «Qazsport» telearnalary tikeleı efırde kórsetedi.
