Qasym-Jomart Toqaev Aýǵanstan men Pákistan elshilerin qabyldady

ASTANA. QazAqparat - Parlament Senatynyń tóraǵasy Qasym-Jomart Toqaev Qazaqstandaǵy Aýǵanstannyń jáne Pákistannyń elshileri Mýhammad Farhad Azımıdi jáne Imtıaz Ahmad Kazıdi olardyń ótinishi boıynsha qabyldady, dep habarlaıdy QazAqparat.

«Senat tóraǵasy aýǵan dıplomatymen kezdesý barysynda Qazaqstan Aýǵanstandy qaıta qalpyna keltirý jónindegi halyqaralyq mindettemelerdi atqara beretinin jáne eldegi jaǵdaıdyń tezirek turaqtanýyna múddeli ekenin atap ótti», - delingen Senattyń baspasóz qyzmeti taratqan málimette.

BUU Qaýipsizdik Keńesiniń turaqty emes múshesi retinde Qazaqstan BUU Qaýipsizdik Keńesi músheleriniń sońǵy jeti jyldaǵy Kabýlǵa alǵashqy saparyn, sondaı-aq Nıý-Iorktegi «Aýǵanstan men Ortalyq Azııadaǵy ózara baılanysty qaýipsizdik pen damýdyń úlgisi retinde aımaqtyq áriptestikti qalyptastyrý» taqyrybynda mınıstrlikterdiń pikirsaıystaryn uıymdastyrdy. Bizdiń elimizdiń aýǵan jastarynyń ókilderine joǵary, tehnıkalyq jáne kásiptik bilim berýge arnalǵan baǵdarlamasyna halyqaralyq qoǵamdastyq joǵary baǵa berip otyr.

Elshi M. Azımı Aýǵanstandaǵy jaǵdaıdy turaqtandyrý jónindegi halyqaralyq kúsh-jigerge qosqan úlesi úshin Qazaqstanǵa alǵysyn bildirdi.

Sonymen qatar, Q.Toqaev Qazaqstandaǵy Pákistan elshisi Imtııaz Ahmad Kazımen kezdesý barysynda Azııa aımaǵyndaǵy Pákistannyń mańyzdy rólin, Qazaqstannyń osy memleketpen saıası jáne ekonomıkalyq yntymaqtastyǵyn kúsheıtý nıetin atap ótti.

Senat tóraǵasy Pákistan men Úndistan arasyndaǵy shıelenisti jaǵdaıdyń tez arada sheshilýine múddeliligin jetkizdi: «Eki el arasyndaǵy ashyq ári syndarly saıası jáne dıplomatııalyq únqatysý qazirgi daǵdarystan shyǵýdyń tıimdi, qolaıly birden-bir joly bolyp tabylady dep sanaımyz», - dedi ol.