Qasym-Jomart Toqaev Atyraýda jaryq jıi sónip qalatynyn synǵa aldy
«Atyraý oblysyndaǵy taǵy bir ózekti másele – elektr jelisiniń tozýy. Onyń 40 paıyzǵa jýyǵy eskirgen. Bıyl 15 eldi mekenniń elektr jelisi jóndelip jatyr. Degenmen, bul jetkiliksiz. Sońǵy jyldary aımaqta elektr qýaty júıesi durys istemeıtin boldy. Óńirdegi energııa tapshylyǵy – shamamen 200 megavatt. Oblysta óziniń elektr stantsııasyn paıdalanyp otyrǵan kásiporyndar bar. Biraq, olardyń múmkindigi sheksiz emes. Ónerkásip oryndary damyp, halyq sany kóbeıgen saıyn qýat kózine degen suranys artady. Atyraý oblysynyń elektr energııasy júıesin túgel jańǵyrtý jumystaryn bastaý qajet. Men byltyr batys aımaǵyn elimizdiń negizgi energetıka júıesine qosý týraly tapsyrma berdim. Úkimet osy máseleni pysyqtap, naqty sheshim qabyldaýy qajet. Sondaı-aq elektr jelilerin jóndeý jumystaryn respýblıkalyq bıýdjetten qarjylandyrý múmkindigin qarastyrý qajet. Budan bólek,«Atyraý Jaryq» kompanııasynyń jumysyna qatysty syn-eskertýler bar. Eger kompanııa óz mindettemesin oryndamasa, ondaı kelisimdi buzý qajet», - dep atap ótti jıynda Prezıdent.
Memleket basshysynyń aıtýynsha, Atyraý oblysynyń ınjenerlik ınfraqurylymyn damytý da – kúrdeli másele.
Munda turǵyn úı qurylysy qarqyndy júrip jatyr. Biraq, eski úıler áli de kóp.
«Kópqabatty turǵyn úılerdiń tórtten biri, ıaǵnı 432 úı apatty jaǵdaıda tur. Úkimet Atyraý oblysynyń ákimdigimen birlesip bul máseleni sheshýge tıis. Sondaı-aq apatty úılerdiń turǵyndaryn kóshirý úshin qurylys jumystaryn jandandyrý qajet», - dedi Qasym-Jomart Toqaev.