Qasym-Jomart Toqaev asyǵys daıyndalǵan zań jobalaryndaǵy olqylyqtardy atady
ASTANA. QazAqparat - Senat tóraǵasy Qasym-Jomart Toqaev Parlament Senatynyń úshinshi sessııasynyń jumysyn qorytyndylady, dep habarlaıdy QazAqparat tilshisi.
«Búgin biz palatanyń úshinshi sessııadaǵy jumysyn aıaqtadyq. Sessııa barysynda ekonomıkalyq, saıası jáne rýhanı jańǵyrý jolyndaǵy irgeli isterdi júzege asyrýǵa qajetti zańdardy qabyldaý boıynsha tyńǵylyqty jumys atqaryldy. Búgingi halyqaralyq ahýalda teketires kúsheıgen kezeńde elimizdiń turaqty damýyn jáne ulttyq múddesin qamtamasyz etýge baǵyttalǵan Memleket basshysynyń strategııalyq sheshimderin zańnamalyq jaǵynan der kezinde qamtamasyz etýdiń mańyzy erekshe. Elbasynyń Joldaýy jáne halyqtyq ál-aýqatyn kózdeıtin bes áleýmettik bastamasynan týyndaıtyn aýqymdy mindetterdi júzege asyrý barysynda Parlament 84 zań qabyldady. Olardyń birqatary kúshine enip, búginde halyq ıgiligine qyzmet etýde. Qazirgi jahandyq ózgerister men syn-qaterler toǵysynda ishki saıası turaqtylyqty saqtaý jáne halyqaralyq arenada ulttyq múddemizdi qorǵaý máseleleri óte mańyzdy. Osy rette taıaýda qabyldanǵan Qaýipsizdik Keńesi týraly Zań qazirgi dúrbeleńge toly dúnıede memleket qaýipsizdigin qamtamasyz etýde, eldegi ishki jáne syrtqy saıasatty júrgizýde Elbasynyń jetekshi róline berik quqyqtyq jaǵdaıdy, kepildikterdi árqashan da qamtamasyz etedi», - dep atap ótti Q. Toqaev Senattyń búgingi jalpy otyrysynda.
Budan bólek, Senat tóraǵasy sessııa barysynda qabyldanǵan birqatar zańdardyń mańyzdylyǵyna toqtaldy. Aldaǵy ýaqytta qabyldanǵan zańdardyń oryndalýy senatorlardyń baqylaýynda bolady.
«Sondaı-aq Parlament qaraýyna kelip túsetin zań jobalarynyń mazmundyq jaǵynan sapasy áli de ózekti bolyp qalýda. Úkimettiń nazaryn osy máselege aýdarǵym keledi. Sebebi asyǵys daıyndalǵan jobalarda kezdesetin olqylyqtar zańnamada qaıshylyqtardyń oryn alýyna jol beredi», - dep eskerdi Qasym-Jomart Toqaev.
Jalpy alǵanda, sessııa barysynda zań shyǵarýshylyqpen qatar, palata qyzmetiniń ózge de baǵyttary boıynsha aıtarlyqtaı jumys atqaryldy. Bilim berý júıesi, densaýlyq saqtaý salasy jáne bank sektory máselelerine, sondaı-aq tsıfrlandyrý baǵdarlamasyna arnalǵan tórt parlamenttik tyńdaý joǵary deńgeıde ótkizildi.
«Alqaly jıyndarda utymdy pikirler men syndarly usynystar aıtylyp, túıtkildi probelamalar jan-jaqty zerdelendi. Kóterilgen keıbir máseleler boıynsha ortalyq atqarýshy organdarǵa tıisti tapsyrmalar júktelip, depýtattyq baqylaýǵa alyndy. Jalpy sessııa barysynda 101 depýtattyq saýal joldandy. Budan bólek, Senattyń turaqty komıtetteri ótkizgen 23 kóshpeli otyrys, 14 dóńgeldek ústel, 19 kezdesý aıasynda zańdardyń jáne memlekettik baǵdarlamalardyń oryndalýy barysy egjeı-tegjeıli talqylandy»,-dedi Senat tóraǵasy.
Eske sala keteıik, 29 masymda Parlament palatalarynyń birlesken otyrysynda altynshy shaqyrylǵan Parlamenttiń úshinshi sessııa qorytyndylanyp, aldaǵy josparlar belgilenetin bolady.
