Qasym-Jomart Toqaev: Astana kósheleri kádimgi muz aıdynyna aınaldy
ASTANA. QazAqparat – Prezıdent Qasym-Jomart Toqaev Astanany damytýǵa arnalǵan keńeste qala kóshelerinde qoqys tastaıtyn jáshikter tabylmaıtynyn, qar ýaqytyly kúrelmeı, kósheler birneshe kún muzaıdynyna aınalyp jatatynyn aıtty, dep habarlaıdy QazAqparat.
«Kelesi másele – qalany abattandyrý. Bul jerde usaq-túıek degen másele bolmaýy kerek, bári – mańyzdy. Ókinishke qaraı, qalanyń kórki qashyp barady. Joldardyń jıegi tegis emes, keıbir kósheler tas qarańǵy. Kóshe boıynan qoqys salatyn jáshik te tabylmaı jatady. Qystygúni qala ishindegi qar ýaqtyly syrtqa shyǵarylmaıtyn kezder de bolady. Qar jaýyp, boran soqsa, turǵyndar qarǵa maltyǵyp jatady.
Jaqynda Astana kósheleri birneshe kún boıy kádimgi muz aıdynǵa aınaldy. Abattandyrý jumysyna sońǵy 3 jylda 45 mıllıard teńge bólindi. Sondaı-aq qaladaǵy úılerdiń aýlasy túgel bir qalyppen emes, óz ereksheligimen salynǵany jón.
Ýrbanıstıka salasynyń mamandarymen, sáýletshilermen, turǵyndarmen birlesip, tyń, jańa tásilderdi qoldaný qajet. Mysaly, ashyq baıqaý jarııalap, ozyq jobalardy tańdap alýǵa bolady. Qalanyń kelbetin árákimniń talǵamy boıynsha ózgerte berýge bolmaıdy. Naqty bekitilgen josparmen júıeli túrde jumys júrgizý kerek», - dedi Toqaev.
Sondaı-aq Memleket basshysy qala turǵyndary qoqysty beıbereket laqtyratynyn, jastar kóshede beıádep qylyqtarǵa baratynyn atap ótti.
«Taǵy bir mańyzdy másele. Qala turǵyndarynyń turmystyq mádenıeti. Astananyń tazalyǵy, eń aldymen, onyń turǵyndaryna baılanysty. Záýlim úılerdiń ishindegi jáne syrtyndaǵy jaǵdaı máz emes. Shyndyǵyn aıtsaq, turǵyndar turmystyq tártipti jıi buzady, qoqysty qalaı bolsa solaı laqtyra beredi. Jastar kóshede júrgende mádenıetsiz qylyqtarǵa jol beredi. Sondyqtan, men myna máselege arnaıy nazar aýdarǵym keledi.
Elordamyzdy jáne basqa negizgi qalalarymyzdy durys qalpynda saqtaý bul – ulttyq namysymyzǵa qatysty asa mańyzdy másele. Kóshpendilerdiń urpaqtary óz qalalaryn jóndi saqtaı almaıdy degen jaǵymsyz pikirdi múldem joqqa shyǵarýymyz kerek», - dedi Prezıdent.
