Qasym-Jomart Toqaev «Anadolu Group» kompanııasynyń prezıdentin qabyldady

NUR-SULTAN. QazAqparat - Qazaqstan Prezıdenti «Anadolu Group» kompanııasynyń prezıdenti Týndjaı Ozılhandy qabyldady, dep habarlaıdy QazAqparat Aqordanyń baspasóz qyzmetine silteme jasap.

Qasym-Jomart Toqaev «Anadolu Group» kompanııasynyń toby álemde, sonyń ishinde Qazaqstanda tanymal ekenin jáne túrli salada tabysty damyp kele jatqanyn atap ótti. Memleket basshysy kompanııanyń el ekonomıkasyna qosqan úlesin joǵary baǵalady.

Týndjaı Ozılhan Qazaqstan Prezıdentine kezdesýge múmkindik bergeni úshin alǵys aıtyp, kompanııanyń bıznestiń jańa salalaryn ıgerýge múddeli ekenin aıtty.

Qazaqstan Prezıdenti men kompanııa basshysy adam kapıtalyn, «qarapaıym zattar» ekonomıkasyn damytý, otandyq taýarlardyń eksporttyq áleýetin arttyrý jáne Qazaqstannyń ınvestıtsııalyq klımatyn odan ári jaqsartý máseleleri boıynsha pikir almasty.