Qasym-Jomart Toqaev ana óliminiń kóbeıýine alańdaýshylyq tanytty
NUR-SULTAN. QazAqparat – Ana men balany qorǵaý, onkologııalyq, kardıologııalyq, pýlmonologııalyq jáne medıtsınalyq kómektiń basqa da túrlerin kórsetý – el aldyndaǵy mindetimiz. Bul týraly koronavırýs indetiniń ekinshi kezeńine daıyndyq máseleleri boıynsha keńeste Memleket basshysy Qasym-Jomart Toqaev aıtty, dep habarlaıdy QazAqparat tilshisi.
«Úkimet medıtsınalyq kómektiń ózge túrlerin de kórsetýdi umytpaýǵa tıis. Ana men bala densaýlyǵyn qorǵaý – negizgi basymdyqtyń biri. Ókinishke qaraı, ana ólimi kórsetkishi barlyq óńirde birneshe ese kóbeıip ketti. Byltyrǵy 8 aıda – 36 áıel qaıtys bolsa, bıylǵy 8 aıda – 131 áıel qaıtys bolypty. Mysaly, Aqtóbe oblysynda bul kórsetkish shamamen 13 ese, Qyzylorda oblysynda 9 ese, Shymkent qalasynda 7 ese artty. Nege bul adamdarǵa kómek kórsetilmedi? Qandaı sharalar qabyldanyp jatyr? Bul óte ózekti suraqtar. Olarǵa ákimder jaýap berý kerek», - dedi Memleket basshysy.
Qazaqstan Prezıdenti Úkimetke óńirlermen birlesip, atalǵan faktilerdiń árqaısysyn tekserip, nátıjesin baıandaýdy tapsyrdy.
«Ana men balany qorǵaý, onkologııalyq, kardıologııalyq, pýlmonologııalyq jáne medıtsınalyq kómektiń basqa da túrlerin kórsetý – el aldyndaǵy mindetimiz. Ákimderdi, jalpy Úkimetti bul mindetten eshkim bosatqan joq. Prezıdent Ákimshiligine osy máseleni baqylaýǵa alýdy tapsyramyn», - dedi Qasym-Jomart Toqaev.
