Qasym-Jomart Toqaev: Almatylyq - qaıtalanbas brend
ALMATY. QazAqparat - Memleket basshysy Qasym-Jomart Toqaev Almatydaǵy Abaı alańynda ótip jatqan merekelik is-sharaǵa qatysty, dep habarlaıdy QazAqparat.
«Kóktemniń osyndaı shýaqty kúninde ózimniń týyp-ósip, mektep tabaldyryǵyn attaǵan, Qazaqstan táýelsizdigi úshin eńbek jolymdy bastaǵan keremet qalada qonaq bolý - men úshin úlken qurmet. Almatynyń aýrasy erekshe. Almatylyq - qaıtalanbas brend jáne ınternatsıonaldylyqtyń shynaıy úlgisi. Qazirgi ýaqytta bul qala elimizdiń iskerlik, qarjy, mádenı, bilim jáne týrıstik ortalyǵyna aınaldy», - dedi Qasym-Jomart Toqaev.
Sondaı-aq, Prezıdent Almatynyń jańa jumys oryndaryn ashyp otyrǵan shaǵyn jáne orta bıznes ortalyǵy ekenin atap ótti. Memleket basshysy qalanyń el tarıhynda erekshe ról oınaǵanyn alǵa tartty.
«Dál osy jerde 1986 jyldyń jeltoqsanynda burynǵy Keńes Odaǵyndaǵy barlyq respýblıkalardyń ári qaraı damýyna yqpal etken oqıǵa boldy. Osy jerde Táýelsizdigimiz týraly deklaratsııa qabyldandy. Mıllıondaǵan qazaqstandyqtardyń jáne búkil elimizdiń taǵdyry Almatymen baılanysty», - dep atap ótti Memleket basshysy.
«Bizdiń basty maqsatymyz – halyqtyń ál-aýqaty men ómir sapasyn kóterý. Ekologııa, ınfraqurylym, qoǵamdyq qaýipsizdik máselelerin birge sheshýge tıispiz. Qalamyz turǵyndarǵa qolaıly jaǵdaı jasaý jáne sheteldik qonaqtardyń jıi kelýi boıynsha kópke úlgi bolyp otyr. Bul qýantady. Avtokólik jáne energııamen qamtý salasynda ekologııalyq taza tehnologııalarǵa kóshetin ýaqyt keldi. JOO túlekteri men jalpy jastarǵa jańa jumys oryndaryn dál osy Almatydan ashamyz», - dedi Memleket basshysy Birlik kúnine arnalǵan merekelik kontsertte.
Qasym-Jomart Toqaevtyń aıtýynsha, Almatyda ejelden túrli ulttar men etnostar turyp keledi. Olar beıbitshilik pen kelisimniń saqtalýyna súbeli úles qosyp júr.
Aıta keteıik, keshe Qasym-Jomart Toqaev jumys saparymen Almatyǵa kelip, birneshe nysandy aralady. Atap aıtqanda, Almatydaǵy ınfraqurylym jobalarynyń júzege asyrylý barysymen tanysty. Memleket basshysy «Baqytty otbasy» ana ortalyǵyna, Jambyl atyndaǵy jasóspirimder kitaphanasyna bardy.
