Qasym-Jomart Toqaev: Almatyǵa «jasyl qala» mártebesin qaıtarýǵa mindettimiz
NUR-SULTAN. QazAqparat – Qazaqstan Prezıdenti Qasym-Jomart Toqaev Almaty qalasyn odan ári damytý máseleleri jóninde ótken keńes barysynda «Jasyl» alapty birtindep keńeıtý ózekti mindet bolyp otyrǵandyǵyn atap ótti, dep habarlaıdy QazAqparat.
Prezıdent bul máselede aǵashtardyń zańsyz otalýyna jáne baqtardyń joıylýyna, onyń ishinde, qalanyń tarıhı ortalyǵyndaǵy kógaldarǵa qatysty alańdaýshylyǵyn bildirdi.
– Qalany kógaldandyrý máselesinde naýqanshylyqqa, uqypsyzdyqqa jáne áldekimderdiń múddelerin qoldaýǵa jol berilmeýi tıis. Bul máselede ǵylymı kózqarasqa, kásibılikke, turǵyndarǵa qolaıly jaǵdaı jasaýǵa jáne qalany úılesimdi damytýǵa basymdyq berilýi kerek. Almatyǵa «jasyl qala» mártebesin qaıtarýǵa mindettimiz, – dedi Memleket basshysy.
Qasym-Jomart Toqaev sondaı-aq sózinde ekologııaǵa, onyń ishinde, ekinshi JEO-nyń qaıta jóndeý jumystarynyń baǵasyn qymbattatpaýǵa jáne ony sozbalańǵa salmaýǵa, úshinshi JEO-ny jańǵyrtýǵa, jeke sektorǵa gaz tartýdy aıaqtaýǵa, kólikterge janar-jaǵarmaıdyń taza túrlerin paıdalanýǵa, qaldyqtardy paıdaǵa jaratýǵa, Saıran sý qoımasy aınalasyndaǵy aýmaqty abattandyrýǵa jáne qalpyna keltirýge erekshe toqtaldy.
Prezıdent Almaty aglomeratsııasyndaǵy qala mańyn jáne eldi mekenderdi damytý qajettigine de toqtaldy.
Qasym-Jomart Toqaevtyń pikirinshe, Almaty – Qazaqstandaǵy eń úlken qala ǵana emes, elimizdegi aglomeratsııanyń iri ortalyǵy.
– Almaty qalasy men Almaty oblysynyń damý máselesin bir-birinen bólip qaraýǵa bolmaıdy. Negizgi sapaly jumys oryndary qalada jasaqtalady. Bul merzimdik mıgratsııany yntalandyrmaı turmaıdy, – dedi Prezıdent.
Osy rette Memleket basshysy Úkimetke Almaty qalasy men Almaty oblysy ákimderimen birlesip, aglomeratsııanyń kóliktik modelin jasaýdy tapsyrdy.
– Almaty aglomeratsııasyn basqarý jónindegi keńesti quratyn kez keldi. Ony byltyr qolǵa alý kerek edi. Ol kezekti otyrys ótkizý organyna aınalmaýy tıis. Oǵan jalpy aglomeratsııalyq máselelerdi sheshý úshin barlyq qajetti ýákilettikterdi berý kerek. Bul máseleni ortalyq deńgeıde sheshý úshin buǵan Premer-Mınıstrdiń orynbasaryn jaýapty etip bekitý qajet, – dedi Qasym-Jomart Toqaev.
Memleket basshysy qalada qaýipsizdikti qamtamasyz etý mańyzdy dep sanaıdy. Ol úshin qalanyń keıbir aýdandaryn jaryqtandyrý, beınebaqylaý kameralarynyń ıntellektýaldyq áleýetin paıdalaný jáne olardy Jedel basqarý Ortalyǵyna ıntegratsııalaý jónindegi máselelerdi sheshý qajet.
