Qasym-Jomart Toqaev Almaty qalasynyń ýrbanıstıka ortalyǵynda boldy
Qasym-Jomart Toqaevqa tsıfrlyq geoaqparattyq ortalyqtyń, «Almaty bas jospary» ǵylymı-zertteý ınstıtýtynyń, Almaty damý ortalyǵynyń jáne «Open Almaty» qoǵamdyq qabyldaýynyń jumystary týraly aqparat berildi.
Memleket basshysy qalany odan ári abattandyrý josparymen tanysyp, shahardyń 3D-kórinisindegi golografıkalyq pishinin qarady.
Qazaqstan Prezıdentine Almaty ındýstrııalyq aımaǵyndaǵy negizgi ınfraqurylymdyq jobalardyń júzege asyrylýy týraly baıandaldy. Munda japon, koreı, qytaı, nemis jáne basqa da sheteldik ınvestıtsııalar esebinen 5 myń jumys ornyn ashýǵa múmkindik bergen, quny 144 mlrd teńge bolatyn 39 joba iske asyrylýda.
Indýstrııalyq aımaqta birneshe joba ornalastyrylǵan. Atap aıtqanda, «Hyundai Trans Kazakhstan» jaýapkershiligi shekteýli seriktestigi, elektr avtobýstaryn shyǵaratyn «Falcon Euro Bus» jaýapkershiligi shekteýli seriktestigi, «Tokyo Rope Almaty» jaýapkershiligi shekteýli seriktestigi, óńdeý, tamaq jáne jeńil ónerkásibi, qaldyqtardy suryptaý kesheni sııaqty kásiporyndar.
Sońynda Memleket basshysy Almaty qalasyn damytý jóninde birqatar naqty tapsyrma berdi.