Qasym-Jomart Toqaev AQSh memlekettik hatshysynyń orynbasaryn qabyldady
Memleket basshysy «S5+1» formatyndaǵy joǵary deńgeıdegi kezdesýge qatysý
úshin Nur-Sultan qalasyna kelgen AQSh memlekettik hatshysynyń saıası máseleler
jónindegi orynbasary Devıd Heıldi qabyldady. Atalǵan format ekonomıka, ekologııa
jáne qaýipsizdik salalary boıynsha Ortalyq Azııadaǵy bes el men AQSh arasyndaǵy
kópjaqty ózara yqpaldastyqtyń tetigi sanalady.
Kezdesý barysynda taraptar Qazaqstan men AQSh arasyndaǵy strategııalyq seriktestikti keńeıtý, terrorızmge qarsy is-qımyldar, sondaı-aq Aýǵanstandy áleýmettik-ekonomıkalyq turǵydan qalpyna keltirý máseleleri jóninde pikir almasty.
Qazaqstan Prezıdenti eki memleket basshylary arasyndaǵy tikeleı telefon baılanysy týraly kelisimge qol qoıýǵa múmkindik bergeni úshin Amerıka tarapyna rızashylyq bildirdi.
Qasym-Jomart Toqaev pen Devıd Heıl 2018 jyly qańtarda Vashıngtonda ótken Qazaqstannyń Tuńǵysh Prezıdenti – Elbasy Nursultan Nazarbaev pen AQSh Prezıdenti Donald Tramp kezdesýiniń qorytyndysy boıynsha qol jetkizilgen ýaǵdalastyqtardyń tıimdi júzege asyrylyp jatqanyn atap ótti.
Amerıkalyq dıplomat Qazaqstandaǵy saıası ózgeristerdi, sonyń ishinde elimizdiń áleýmettik-ekonomıkalyq damýyn jáne demokratııalyq úderisterdi nyǵaıtý jónindegi Qazaqstan Prezıdentiniń alǵa qoıǵan maqsattary men mindetterin qoldaıtynyn atap ótip, olardy iske asyrý úshin kómektesýge daıyn ekenin aıtty.
