Qasym-Jomart Toqaev ákimderge «jerleýden jemtik izdegenderdi» jónge keltirýdi tapsyrdy
NUR-SULTAN. QazAqparat - Prezıdent Qasym-Jomart Toqaev keıbir pysyqtar paıda tabý úshin barlyq adamgershilik qaǵıdattardy attap ótip, halyqty aldaý men bopsalaýdan taıynbaı otyrǵanyn jetkizdi, dep habarlaıdy QazAqparat tilshisi Aqordaǵa silteme jasap.
Prezıdenttiń aıtýynsha, máıithanalar men jerleý qyzmetinde soraqy tirlikter atqarylyp jatyr.
«Sońǵy eki aptada máıitti tasymaldaý jáne jerleý úshin tólenetin aqy qatty ósip ketken. Muny kópshiliktiń qaltasy kótere bermeıdi. Ákimderge bir kún ishinde «jerleýden jemtik izdegenderdi» jónge keltirýdi tapsyramyn», – dedi Qasym-Jomart Toqaev koronavırýs ınfektsııasynyń taralýyna qarsy kúres máseleleri boıynsha selektorlyq otyrysynda.
Prezıdent sondaı-aq dertke shaldyǵýshylar sanynyń artýy, koronavırýs reıtıngine ǵana emes, Qazaqstannyń ınvestıtsııalyq ahýalyna, týrıstik áleýetine jáne elimizge tartylatyn jańa tehnologııalarǵa da keri áser etetinin atap ótti. Úkimet barlyq syn-qaterlerdi joıý úshin bul jaǵdaıdy óziniń jumys josparynda eskerýi kerek.
Qazaqstan Prezıdenti pandemııa kezindegi kez kelgen qate sheshim, bıýrokratııalyq kedergiler, jaýapkershilikten bas tartý júzdegen adamnyń ómiri men densaýlyǵyna zııan tıgizýi múmkin ekenin basa aıtty.
Jıyn sońynda Memleket basshysy koronavırýs jónindegi barlyq derek, onyń ishinde, statıstıkalyq málimetter Úkimettiń aıryqsha quzyretinde bolýy qajet ekenin málim etti. Óıtkeni bul jekelegen adamdardyń jalǵan aqparat taratyp, qoǵamdy adastyrýdan saqtaıdy.
