«Qasym han» tarıhı fılmine kastıng jarııalandy
ASTANA. QazAqparat - «Qazaqfılm» aýqymdy tarıhı kınojobaǵa kastıng jarııalady, dep habarlaıdy QazAqparat kınostýdııanyń baspasóz qyzmetine silteme jasap.
Atalǵan kınotýyndyny QR Mádenıet jáne sport mınıstrligi tapsyrysy boıynsha Sh.Aımanov atyndaǵy «Qazaqfılm» AQ túsiredi.
Kınojoba qazaqtyń uly handarynyń biri - Qasym hannyń ómiri týraly baıandaıdy.
«Fılmniń kórkemdik jetekshisi - «Ertuǵyryl» serıalyn túsirip jatqan túrik rejısseri Metın Gıýnaı. Basty rólderge, qosalqy jáne epızodtyq rólderge 3 jáne 80 jas aralyǵyndaǵy barlyq qazaqstandyqtar (balalar, er adamdar men áıelder) qatysa alady (er azamattardyń boıy 180 sm. kem bolmaýy tıis).Basty talap - qazaq tilinde erkin sóıleýi kerek. Kastıng Qazaqstan boıynsha ótedi», - delingen habarlamada.
Almaty qalasynda kastıng jumystary 25 qańtardan bastalady.
Kastıngke qatysý úshin kazakhfilmcast@gmail.com elektrondy poshtasyna kelesi aqparattardy: jaqynnan bet boıaýsyz, kózildiriksiz jáne lınzasyz, bas kıimsiz, óńdelmegen fotosýretterdi (selfı emes), sondaı-aq tula boıy kórinetin bir sýret, jáne ózi týraly qysqasha aqparatty (aty-jóni, jasy, boıy men salmaǵy, bilimi jáne kınodaǵy tájirıbıe týraly) joldaý kerek.
«Qurmetti áıelder qaýymy! Kastıngke bet boıaýsyz jáne jasandy kirpiksiz kelýlerińizdi suraımyz. Tatýajy bar qyz-kelinshekterdi qabyldamaımyz», - dep eskertedi kınostýdııadan.
Eske sala ketsek, QR Mádenıet jáne sport mınıstri Arystanbek Muhamedıuly Qasym han týraly fılmniń stsenarııi jazylyp jatqanyn byltyr habarlaǵan bolatyn.
«Qasym han týraly fılmniń jobasy boıynsha biz kartınanyń stsenarııine tapsyrys berdik. Álbette, ol stsenarııdiń qalaı jazylǵanyna den qoıarymyz anyq. Eger onda Qasym hannyń barlyq erligi men ómiri qamtylmasa, ary qaraı jumysty jalǵastyratyn bolamyz. Rejısser - «Ertuǵyryl» serıalyn túsirgen túrik rejısseri bolady. Ol qazaqstandyq mamandarmen birge stsenarııdi jazyp shyqty. Qazirgi tańda qazaqstandyq rejısserler iri jobalarmen júr. Aqan Sataev «Tumar patshaıymdy» túsirip jatsa, Rústem Ábdirash «Almas Qylyshty» jalǵasyna kirisip ketti. Álemdik deńgeıge jetý úshin biz moıyndalǵan rejısserler men avtorlardy shaqyrýymyz kerek», - degen edi Arystanbek Muhamedıuly.
