«Qasym» fılmi arqyly biz tarıhı ádildikti ornatyp otyrmyz - «KTK» telearnasynyń bas dırektory
Sondyqtan biz bul olqylyqty joıyp, qazaqtyń birtýar batyry Qasym Qaısenovtyń erligin baıandaıtyn fılmi arqyly tarıhı ádildikti ornatýdy kózdedik. Búgin «Qasym» atty fılmine arnalǵan baspasóz máslıhatynda ıdeıa avtory, «KTK» telearnasynyń bas dırektory Arman Shoraev osylaı málim etti.
Onyń aıtýynsha, fılm tarıhı derekterdiń negizinde túsirilgen. «Bas kezinde stsenarıı avtory Andreı Kýreıchık Qasym týraly materıaldardy ǵalamtordan oqyp shyqqanan keıin bizge birden habarlasyp: «Aqshany tólemeseńder de, men bul kisi týraly stsenarıı jazamyn, ruqsat bolsa?», - dep suraqty tótesinen qoıdy. Fılmde tarıhı derekter bar. Biraq kórermenniń qyzyǵýshylyǵyn arttyrý úshin avtor keıbir oqıǵalardy oıdan shyǵardy. «Qasym» fılmin áskerı detektıv deýge bolady. Eń bastysy, biz soǵys kezindegi qazaq batyrynyń erligin kórsete bildik. Negizi, Uly Otan soǵysynda qaza tapqan ulttardyń sany jaǵynan qazaqtar tórtinshi orynda tur ǵoı. Biz Uly jeńiske úlken úles qostyq. Túrki halyqtarynyń ishinde Álııa men Mánshúk «Keńes Odaǵynyń Batyry» ataǵyna ıe boldy. Onyń ózi qazaq halqynyń óshpes rýhyn kórsetse kerek. Men ózim reseılik serıaldardy kórgen kezde, ózbek, qyrǵyz, tipti býrıattardy jıi baıqaımyn. Al qazaq týraly eshteńe aıtylmaıdy. Sondyqtan osy «Qasym» atty fılmdi túsirý arqyly biz tarıhı ádildikti ornatyp otyrmyz», - dep atap kórsetti A.Shoraev.
«Qasym» atty tórt serııaly týyndy «Qazaqstan» ulttyq arnasy, «Eýrazııa» birinshi arnasy, «INTRA Communication» (Reseı) jáne «FILM UA» (Ýkraına) kompanııalarynyń qatysýymen túsirildi. Fılmde Qasymnyń rólin Qalıbek Qýanyshbaev atyndaǵy qazaq drama teatrynyń akteri Qýandyq Qystyqbaev somdaǵan. Stsenarıı avtory - Andreı Kýreıchık. Rejısseri - Leonıd Belozorovıch. «Qasym» fılmi Qazaqstanda ǵana emes, Reseı men Ýkraınada da kórsetiledi. Sebebi bul jobaǵa osy eki eldiń shyǵarmashylyq ujymdary atsalysyp, qarjy quıdy.
Aıta keteıik, 7 mamyr kúni keshki saǵat 19:30-da «Qasym» serıaly «Qazaqstan» ulttyq arnasynan kórsetile bastaıdy. Al 9 mamyrda «Eýrazııa» birinshi arnasy onyń tórt serııasyn birden ekranǵa shyǵarmaq. 22 maýsym kúni «KTK» telearnasy qaıtalap kórsetedi.
