Kastıng úshin mıllıondar: Almatydaǵy kınostýdııa tóńireginde daý týyndady
ALMATY. KAZINFORM — Almatyda Jan Production jekemenshik kınostýdııasyna qatysty tergeý júrgizilip jatyr.
Tergeýdiń bastalýyna balalaryn qomaqty qarjy tólep kastıngke qatystyrǵan ata-analardyń aryzy sebep bolǵan. Olardyń aıtýynsha, kastıng úshin mıllıondar tólenbese, kınojoba júzege asyrylmaǵan.
Bul bastama byltyr áleýmettik jelilerdegi jarnamadan keıin keńinen tanyldy.
Beınerolıkterde qazaqstandyq akterler balalardy biregeı kınojobaǵa shaqyrdy.
Qatysýshylarǵa kıno túsý, kınoteatrdaǵy premera jáne lımýzınmen serýendeý ýáde etildi.
Sol kezde ata-analardyń biri túsirilimge qatysý úshin 1,5 mıllıon teńgege deıin qarajat suralyp jatqanyn aıtyp, onyń qaýpi týraly ashyq eskertken bolatyn.
Keıinirek esimi stýdııa ataýymen baılanystyrylǵan qazaqstandyq akter Jan Baıjanbaev kompanııanyń ıesi nemese negiz qalaýshylardyń biri emes ekenin, sondaı-aq kastıngterdi uıymdastyrýǵa qatysy joq ekenin málimdedi.
Onyń aıtýynsha, atalǵan jobalarmen tek akter retinde jumys istep, ambassador retinde óner kórsetken. Al kompanııa ataýyn onyń shyǵarmashylyǵyn unatatyn kınostýdııa ıesi tańdaǵan.
Sondaı-aq Jan Baıjanbaev prodakshnnyń baǵa saıasatynan habary joqtyǵyn jáne tek óziniń kásibı qyzmetimen aınalysatynyn atap ótti.
Almaty qalasynyń polıtsııa departamenti atalǵan derek boıynsha «alaıaqtyq» babymen qylmystyq is qozǵalǵanyn habarlady. Qazirgi ýaqytta tergeýshiler stýdııa basshylyǵy men qyzmetkerlerinen jaýap alýǵa kirisken. Aldyn ala málimetter boıynsha júzge jýyq adam Bostandyq aýdandyq polıtsııa basqarmasyna aryz túsirýge nıetti. Eger uıymdastyrýshylardyń kinási dáleldense, kompanııa basshysy jeti jylǵa deıin bas bostandyǵynan aıyrylýy múmkin.
Eske salaıyq, buǵan deıin Almatyda balalardy oqytatyn onlaın-servıske qatysty daý týyndady.