Qasteev atyndaǵy óner mektebi jekemenshikke satylyp ketti
ALMATY. QazAqparat - Almatydaǵy Á. Qasteev atyndaǵy beıneleý óneri men tehnıkalyq dızaın mektebi bássaýdada úshinshi retten satyldy, dep habarlaıdy QazAqparat tilshisi.
Qalalyq Qarjy basqarmasynyń QazAqparat tilshisiniń saýalyna bergen jaýabynda óner mektebiniń 270 mln teńgege satylǵany aıtyldy.
Bastapqyda nysandy táýelsiz baǵalaýshy 657 479 000 teńgege baǵalaǵan bolatyn.
2017 jyly 18 tamyzda satyp alýshylar bolmaýy sebepti saýda bolmady.
Ekinshi ret 20 qyrkúıekte bastapqy quny eki esege arzandatylyp 328 739 500 teńge boldy. Tek 1 qatysýshynyń kelýine baılanysty tender bolmady.
19 qazanda basty baǵasy 164 369 750 teńgeden bastaldy. 4 qatysýshynyń ishinde eń joǵary baǵa - 270 mln teńge usynǵan qatysýshy satyp aldy.
Óner mektebin satyp alǵan kompanııanyń ókili Ramazan Tuńǵyshbaev kelisimsharttyń basty talaby - mekteptiń profıli saqtalýy ekendigin atap ótti.
«Adamdar aıtyp jatqandaı, ol jerde eshkim bıznes ortalyq salyp, jerdi paıdalanýdy kózdep otyrǵan joq. Ǵımarat 1981 jyly salynǵan, eski. Sondyqtan ol ǵımarat emes onyń ishindegi mazmuny basty qundylyq bolyp otyr. Mektepte 700 oqýshy bilim alyp jatyr, mamandar bazasy qalyptasqan. Biz ujymdy damytyp, halyqaralyq dárejege kóteremiz», - dedi Tuńǵyshbaev.
Jańa qojaıyndardyń aıtýynsha, jaqyn arada baǵdarlama ózgermeıdi. Olar jańa tehnologııalardy damytyp, jańa baǵyttardy damytýǵa múddeli ekendikterin aıtty.
Al nysannyń profıli saqtalýyn qalalyq qarjy basqarmasy qadaǵalaıtyn bolady. Eger, bul shart saqtalmasa nysan memleketke qaıtarylady.
Basqarmanyń habarlaýynsha, 2014 jyly Úkimet bekitken óner mektebi Jekeshelendirýdiń keshendi josparyna engen.
Memleket basshysynyń tapsyrmasymen mýnıtsıpaldy nysandardyń jekemenshikke berilýi 2018 jyldyń sońyna deıin aıaqtalýy tıis.
«Kúntizbege sáıkes 2017 jyly bul nysan básekeli ortaǵa berilýi tıis bolǵan. Eń basty shart nysannyń profıli, baǵyty jabylǵansha saqtalýy tıis. Sonymen qatar ǵımarat ta saqtalýy kerek», - dedi qarjy basqarmasynan.
Almaty ákimdigi 2017 jyly memleket menshigindegi nysandardyń - 80%-yn, 2018 jyly 20 %-yn satyp jiberýdi kózdep otyr.
