Qasteev atyndaǵy mýzeı Uly Jibek joly mýzeıleriniń alıansyna endi
Forýmnyń basty maqsaty - kórkemóner mýzeıleri men Uly jibek joly galereıalarynyń alıansyn qurý bolatyn.
Forýmnyń birinshi otyrysyna «bir beldeý, bir jol» aýmaǵynda ornalasqan elderdiń ulttyq óner mýzeıleri men basty kórkemdik ınstıtýttarynyń ókilderi qatysty.
Forýmda Frantsııa, Gretsııa, Vengrııa, Shrı Lanka, Bangladesh, Gonkong, Vetnam, Belarýs, Armenııa, Reseı, Ýkraına, Moldova, Bolgarııa, Sıngapýr, Ońtústik Koreıa elderiniń delegattary bas qosty. Ortalyq Azııadan Á. Qasteev atyndaǵy QR Memlekettik óner mýzeıi bardy. Qytaı jaǵynan jetekshi kórkemsýret mýzeıleriniń dırektorlary qatysty.
«Baıandamashylar ózderiniń mýzeıleri, mýzeı kollektsııalary jaıly sóz etti. Olar ózderiniń ınstıtýtsııalaryn ózgeshe etip tanystyrdy, muny túrli elderdiń kollektsııalarynyń jaı-japsaryn tolyqtaı túsindirgen asa qyzyqty tanystyrylym boldy deýge bolady. Biz Á. Qasteev atyndaǵy mýzeıdiń ónerdiń bes eli men bes ǵasyryn aralap qaıtýǵa bolatyn Shyǵys jáne Eýropa ónerinen bastap qazirgi zamanaýı Qazaqstan ónerine deıingi alýan túrli kórkemdik kollektsııasy jaıly habardar ettik. Ár eldegi óner men mýzeı isiniń damýyna tán erekshelikterdi bilý óte mańyzdy», - dedi Ábilhan Qasteev atyndaǵy Memlekettik óner mýzeıiniń dırektory, professor Gúlmıra Shalabaeva.
Forýmnyń sońǵy kúni Alıansty qurý jaıly Kelisimshartqa qol qoıylǵannan keıin, delegattar bolashaq kórkemsýret kórmelerimen, mamandarmen almasý jáne restavratorlardyń taǵlymdamasy men oqýyn uıymdastyrý máselelerin talqylady. Uıymnyń jańa logotıpi alqaly túrde tańdap alynyp, Halyqaralyq Alıanstyń Jarǵysy qabyldandy. Hatshylyq tóraǵasy bolyp jumysshy organ NAMOC dırektory, qytaı eliniń ókili Ý Veı Shan saılandy.
Bolashaqta Qytaı Ulttyq mýzeıinde Alıansqa qatysýshy elderdiń mýzeı kollektsııalarynyń eksponattary men úzdik úlgilerin kórsetetin birikken kórme ótkiziledi.