Qastandyq, temir kúmbez, Harrıstiń áreketsizdigi – Donald Tramptyń Ilon Maskpen suhbaty
ASTANA. KAZINFORM – «Tesla Motors» bas atqarýshy dırektory Ilon Mask Respýblıkalyq partııa atynan prezıdenttikke kandıdat Donald Tramptan dúısenbi kúni keshke «X» áleýmettik medıa-platformasynda suhbat aldy. Bul týraly agenttiktiń menshikti tilshisi habarlaıdy.
Suhbat jergilikti ýaqyt boıynsha saǵat 20:00-de tikeleı efırde bastalýy kerek edi, biraq tehnıkalyq qıyndyqtar týyndady.
Ilon Masktyń paıymdaýynsha, kóptegen tyńdaýshylarǵa platformaǵa kirýge DDOS shabýyly sebep bolýy múmkin. Ázirge tehnıkalyq aqaý qoldan jasalǵan ba, álde suhbatqa qatysqysy kelgen tyńdarmandardyń kóptiginen be, ol jaǵy belgisiz.
Áńgime Donald Trampqa qastandyq jasaý jáne zańsyz kóshi-qon týraly suraqtan bastaldy.
«Bul bir ǵajaıyp boldy. Eger sol kezde basymdy buryp qalmasam, sizdi qansha jerden unatsam da qazir osylaı sóılesip otyrmas edim. Men onyń oq ekenin jáne onyń qulaǵyma tıgenin birden túsindim. Meniń oıymsha, qudaıǵa senbeıtinder oılanýy kerek», - dedi Donald Tramp ózine jasalǵan qastandyq týraly aıta otyryp.
Sondaı-aq, Donald Tramp endi Qudaıǵa burynǵydan da shynaıy senetinin aıtady, bul onyń dinı saılaýshylaryna jaǵary sózsiz.
Prezıdenttikke úmitker qazan aıynda taǵy bir saılaýaldy is-shara ótkizý úshin Pensılvanııadaǵy Batler qalasyna oralýdy josparlap otyrǵanyn aıtty. Óıtkeni, aldyńǵy kezdesýde shabýyl jasalǵandyqtan is-shara kenetten toqtatyldy.
Tramp Batlerde saılaýshylarmen kezdesýdegi sózin «Buǵan deıin aıtqanymdaı» degen sózden bastaıtynyn aıtyp ázildedi, al Ilon Mask «Sizdi dóreki túrde toqtatqanǵa deıin» dep ázilge qosyldy.
Sonymen qatar Donald Tramp AQSh-taǵy zańsyz mıgratsııa máselesin qozǵady. Aıtýynsha, elge 20 mıllıonǵa jýyq zańsyz mıgrant kelgen jáne olar qaýipti adamdar.
«Sizge aıyna mıllıondaǵan adam keledi, al ol ornynan turyp, birdeńe jasaǵaly jatqandaı keıip tanytady»,- dedi Donald Tramp Kamala Harrıske qarata.
Ol 13 shildedegi zańsyz mıgratsııa derekterin kórsetetin dıagrammaǵa qatysty boljam jasady.
«Zańsyz mıgratsııa meniń ómirimdi saqtap qaldy», - dep ázildedi Donald Tramp.
Donald Tramp demokrat qarsylasy Kamala Harrıs pen AQSh Prezıdenti Djo Baıdendi synǵa aldy. Kamala Harrıske degen narazylyq onyń Demokratııalyq partııa atynan prezıdenttikke úmitker bolǵannan beri úlken suhbat bergisi kelmeýimen baılanysty boldy.
Donald Tramp Djo Baıdenniń prezıdenttik jarystan shyqqanyna ókinish bildirdi, ol AQSh Prezıdentimen revansh ótkizgisi kelgen edi. Ol Ilon Maskqa bergen suhbatynda Dj. Baıden tóńkeristiń saldarynan AQSh-taǵy prezıdenttik jarystan shyǵýǵa májbúr bolǵanyn málim etti.
«Men Baıdendi pikirtalasta oısyrata jeńgenim sonshalyq, ol ketýge májbúr boldy. Dj. Baıdenniń ketýi – Amerıka Qurama Shtattarynyń Prezıdentiniń tóńkerisi boldy», - dep atap ótti Donald Tramp Djo Baıdenniń kandıdatýrasyn alyp tastaýǵa qatysty.
Donald Tramp AQSh-ta «Temir kúmbez» zymyranǵa qarsy qorǵanys júıesin qurý qajettigine taǵy da toqtaldy.
«Nege bizde «Temir kúmbez» bolmasqa? Izraılde bar», - deıdi Donald Tramp.
Odan bólek, Tramp AQSh-tyń Bilim mınıstrligine narazylyǵyn jetkizdi.
«Men Bilim mınıstrligin jaýyp, bilim berýdi shtattarǵa qaıtarǵym keledi», - dedi D. Tramp.
Prezıdenttikke úmitkerdiń pikirinshe, amerıkalyq stýdentter búkil álemdegi qurdastarymen salystyrǵanda artta qaldy. Bilim mınıstrligin joıýdyń basty artyqshylyqtarynyń biri - bilim berý shyǵyndaryn eki ese azaıtý.
Suhbat barysynda Donald Tramp onyń ákimshiligi amerıkalyqtarǵa tarıhtaǵy eń aýqymdy salyq jeńildikterin jasaǵanyn málimdedi.
Suhbattyń ekinshi jartysynda Ilon Mask memlekettik shyǵyndardy esepteýde óz kómegin usyndy, al Donald Tramp onyń qatysýyn qabyl alatynyn aıtty. Mamyr aıynda amerıkalyq BAQ D. Tramp jeńiske jetken jaǵdaıda onyń ákimshiliginde keńesshi laýazymyn usynýdy qarastyryp jatqanyn habarlaǵan edi.
Sonymen qatar D.Tramp jasandy ıntellektige qatysty alańdaýshylyq tanytty, sebebi JI elektr energııasy shyǵynyn talap etedi.
«Bul meniń jaǵamdy ustatady, biraq jasandy ıntellekt qazirgi bizdiń el óndirisinen eki ese kóp energııany qajet etedi, buǵan senińiz», - dedi Donald Tramp.
«X» platformasynyń esepteýinshe, 2 saǵattan astam ýaqytqa sozylǵan suhbatty 1 mıllıonnan astam adam qarady.
Atalǵan suhbat D.Tramptyń saılaý naýqanyn jandandyrýǵa kómektesýge arnalǵan, óıtkeni onyń demokrattyq básekelesi, vıtse-prezıdent Kamala Harrıs qoǵamdyq saýalnama boıynsha alǵa shyqty.
