Kassırdi syzdyq, ınjenerdi engizdik - Isekeshev bilim granttarynyń tizimi jaıly
ASTANA. QazAqparat - Astana qalasynyń ákimi Áset Isekeshev elordaǵa kerekti mamandyqtar boıynsha granttar tizimi boıynsha memlekettik tapsyrystarǵa ózgerister engizilip jatqanyn málim etti, dep habarlaıdy QazAqparat tilshisi.
«Biz «Astana Smart-sıtı» jobasy aıasynda birqatar jobalardy bastadyq. Olardyń biri - Bıg-data. Demek, bul jasandy ıntellekti qoldana otyryp, aýqymdy málimetterdi qoldanýǵa, taldaýǵa múmkindik beredi. Osy baǵdarlamanyń kómegimen, biz memlekettik tapsyrystardan eskirgen mamandyqtardy alyp tastadyq. Máselen, ol tizimnen kontroler, kassır sekildi mamandyqtar alyndy. Bul mamandyqty ıgergen jastarǵa jumys tabý áste ońǵa túspeıdi. Olar mańyzdy bolmaı qalady. Mine, osy baǵdarlama arqyly suranysqa ıe jáne naryqqa qajetti jańa tehnologııalyq mamandyqtardy aıqyndap otyrmyz», - deıdi shahar basshysy «Rýhanı jańǵyrý» baǵdarlamasyn júzege asyrý týraly OKQ-da ótken baspasóz máslıhatynda.
Onyń aıtýynsha, Astana úshin suranysqa ıe bolatyn mamandyqtardyń qatarynda - lıftter boıynsha jumys atqaratyn ınjenerler, «D» sanatyndaǵy avtobýs júrgizýshileri bar. Avtobýs júrgizýshileri daıyndalmaıtyndyqtan, elordada bul rette jetispeýshilik seziletin kórinedi. Biraq, dese de, negizgi basymdyq tehnologııalyq mamandyqtarǵa berilmek.
«Aqparattyq tehnologııalar, kıberqaýipsizdik, zamanaýı óndiris, kólik, gazıfıkatsııa, medıtsına sekildi salalarǵa nazar aýdarylady. Osyny esepke ala otyryp, biz «Bárine qoljetimdi bilim» jobasymen birge qoljetimdi jumys oryny baǵdarlamasyn engizdik. Osy jyly onymen 30 myń elorda turǵyny qamtylady. Olardyń ishindegi 16,5 myńy tegin oqytylmaq. 10 myńy tsıfrlyq daǵdy boıynsha, myńy kásipkerlik negizi boıynsha bilim alady. Demek, joǵary bilim boıynsha tapsyrys beriledi. Máselen, bizge geografııa, qazaq, aǵylshyn tilderi pánderinen muǵalimder kerek. Demek, bul rette qalaǵa kerekti mamandyqtar boıynsha myń mamandyqqa tapsyrys beremiz», - deıdi ol.
