Kassatsııalyq sottar departamenti quryldy
ASTANA. KAZINFORM – Elimizde kassatsııalyq sottar departamenti quryldy. Bul jaıynda Memleket basshysy qol qoıǵan Jarlyqta aıtylǵan.
- «Qazaqstan Respýblıkasy Sot ákimshiliginiń Kassatsııalyq sottar departamenti» respýblıkalyq memlekettik mekemesi qurylsyn, - delingen resmı qujatta.
Sonymen qatar atalǵan jarlyqpen Joǵarǵy sot sanyndaǵy sot ádildigi sapasy jónindegi komıssııa týraly erejege túzetýler engiziledi. Komıssııa 9 músheden turady. Olardyń tórteýi oblystyq jáne olarǵa teńestirilgen sottardyń sýdıalary, ekeýi kassatsııalyq sottardyń sýdıasy, bireýi Joǵarǵy sot sýdıasy jáne ekeýi otstavkadaǵy sýdıa.
Komıssııa quramyna Joǵarǵy sottyń tóraǵasy jáne sot alqasynyń tóraǵalary, kassatsııalyq sottardyń tóraǵalary, oblystyq sottardyń tóraǵalary men sot alqalarynyń tóraǵalary, Joǵarǵy sot keńesiniń, Sýdıalar odaǵy fılıaldarynyń ádep jónindegi komıssııasynyń jáne Joǵarǵy sot keńesi janyndaǵy Sot tóreliginiń sýdıalary-músheleri kire almaıdy.
Buǵan deıin elimizde kassatsııalyq sottar qurylatynyn jazǵan edik.