Kassatsııalyq sot Óskemende ózin qurylysshy retinde tanystyrǵan alaıaqty aqtaǵan úkimniń kúshin joıdy
ÓSKEMEN. KAZINFORM – Kassatsııalyq sot Óskemende ózin resmı qurylys kompanııasynyń ókili retinde kórsetip, tapsyrys berýshilerdi 23 mln teńgeden astam somaǵa aldaǵan merdigerge qatysty aıyptaý úkimin qaıta kúshine engizdi.
Qala turǵyny ınternette jeke turǵyn úıler salý jáne páterlerdi tolyq jóndeý qyzmetterin usynatyny týraly habarlandyrýlar jarııalaǵan. Klıentterdiń senimine kirý úshin ol ózin iri qurylys kompanııasynyń basshysy retinde kórsetip, keńse ashqan, JShS men jeke kásipkerlikti tirkegen, mór jasatyp, tapsyrys berýshilermen resmı merdigerlik sharttar jasasqan.
Alaıda qurylys materıaldaryn satyp alý men jumys aqysyn tóleý úshin qomaqty kólemde aldyn ala tólem alǵannan keıin kásipker tapsyrys berýshilermen baılanysyn úzgen. Onyń ústine, bastapqyda turaqty jumys isteıtin qurylysshylar brıgadasy da, jeke qurylys tehnıkasy da bolmaǵan.
Burynǵy klıentter aldyndaǵy mindettemelerin oryndamaǵanyna qaramastan, ol jańa tapsyrys berýshilerdi tartýdy jalǵastyrǵan. Qylmystyq is boıynsha toǵyz adam jábirlenýshi dep tanyldy.
Birinshi satydaǵy sot aıyptalýshynyń áreketin iri mólsherdegi alaıaqtyq dep tanyp, ony úsh jyl tórt aıǵa bas bostandyǵynan aıyrdy. Sondaı-aq jábirlenýshilerge keltirilgen 23 mln teńgeden astam shyǵyndy óteýge mindettedi.
Alaıda keıin apellıatsııalyq sot alqasy isti qaıta qarap, sol úkimniń kúshin joıdy jáne aıyptalýshyny tolyq aqtady. Apellıatsııalyq ınstantsııa jóndeý jumystarynyń merziminde aıaqtalmaýyna baılanysty týyndaǵan daýdy azamattyq-quqyqtyq qatynastar aıasyndaǵy másele dep baǵalaǵan.
Buǵan prokýratýra men jábirlenýshiler kelispeı, apellıatsııalyq sheshimge kassatsııalyq tártippen shaǵym túsirdi.
– Sot alqasy apellıatsııalyq ınstantsııa dáleldemelerge birjaqty baǵa bergenin anyqtady. Aıyptalýshy buryn qabyldaǵan mindettemelerin oryndamaı, qajetti mamandary men materıaldyq-tehnıkalyq bazasy bolmaǵanyna qaramastan, jańa kelisimsharttar jasasqan. Keńseniń, JShS men jeke kásipkerliktiń, mórdiń bolýy, jekelegen eńbek sharttaryn jasasýy jáne jumystardyń belgili bir bóligin oryndaýy adal qyzmettiń kórinisin qalyptastyrý ári senimdi merdigerdiń syrtqy atrıbýttaryn jasaý retinde baǵalanýy tıis. Sebebi túpkilikti nátıje bolmaǵan, al qarajattyń edáýir bóligi jábirlenýshiler úshin qaıtarymsyz joǵalǵan, – dep habarlady qylmystyq ister jónindegi kassatsııalyq sottan.
Nátıjesinde kassatsııalyq sot aqtaý týraly qaýlynyń kúshin joıyp, birinshi satydaǵy sottyń aıyptaý úkimin ózgerissiz qaldyrdy.
Endi sottalǵan azamat taǵaıyndalǵan jazasyn ótep, jábirlenýshilerge keltirilgen materıaldyq shyǵyndy óteýge tıis.
Eske salsaq, osyǵan deıin Mańǵystaýda erli-zaıypty 3 mln teńge bopsalaǵany úshin sottalǵany habarlanǵan.
