Kassatsııalyq sot oqýshyny jezókshelikke májbúrlegenderdiń úkimin ózgerissiz qaldyrdy
ASTANA. KAZINFORM — Qylmystyq ister jónindegi kassatsııalyq sot kámeletke tolmaǵandardyń isteri jónindegi mamandandyrylǵan aýdanaralyq sotynyń úkimin jáne Qyzylorda oblystyq sotynyń qylmystyq ister jónindegi sot alqasynyń qaýlysyn zańdy ári negizdi dep tapty.
— Kassatsııalyq sot birinshi jáne apellıatsııalyq satydaǵy sottardyń sheshimderimen kelisedi. Іstiń mán-jaılary tolyq jáne durys anyqtalǵan, kiná jábirlenýshi men kýálardyń aıǵaqtarymen, sondaı-aq sot saraptamalarynyń qorytyndylarymen rastalǵan, — delingen Qylmystyq ister jónindegi kassatsııalyq sottyń habarlamasynda.
Sonymen qatar sottalǵandarǵa taǵaıyndalǵan jaza qylmystyq zań baptarynyń sanktsııasy sheginde belgilengen jáne quqyq buzýshylyqtyń sıpaty men aýyrlyǵyna, jeke bastaryna, istiń mán-jaılaryna saı ekeni atap ótilgen.
Eske salsaq, 2024 jyldyń aqpanynan bastap úıine kelmeı ketken 16 jastaǵy qyzdyń oqıǵasy qoǵamdy dúrliktirdi. Otbasynyń jalǵyz balasy bolǵan qyzdy synyptastary men basqa da adamdar jezókshelikke májbúrlep, uzaq ýaqyt quldyqta ustaǵany anyqtalǵan.
Ata-anasy polıtsııaǵa birneshe ret habarlasqanymen, quzyrly organ qyzdy izdeýdiń ornyna «ata-ana quqyǵynan aıyramyz» dep qorqytqan. Amaly taýsylǵan ata-ana qyzyn ózderi izdegen. Qyz birde «kafede daıashymyn», birde «gúl satamyn» dep aldaǵan. Ata-anasy barǵan jerde qyz bolmaı shyqqan. Keıin belgili bolǵandaı, ony ustaýshylar ata-anasynyń shý shyǵarmaýy úshin osylaı istetken.
Sonymen qatar QR ІІM Tergeý departamenti is Qylmystyq kodekstiń 134-baby 3-bóligi (kámeletke tolmaǵandardy jezókshelikke tartý) boıynsha tergelip jatqanyn rastaǵan edi.
Oqıǵa saldarynan Qyzylordadaǵy № 7 mektep-lıtseıdiń dırektory, tárbıe jónindegi orynbasary, psıhologi, áleýmettik pedagogi jáne eki synyp jetekshisi qyzmetinen bosatyldy.
Jaqynda Qyzylordada 16 jastaǵy qyzdy seksýaldyq quldyqta ustaǵan 9 sottalýshy kassatsııalyq sotqa shaǵymdanǵanyn jazǵanbyz.
Budan buryn Qyzylorda qalalyq qylmystyq ister jónindegi soty 9 adamǵa úkim shyǵardy.