Kásiptik eńbekke qabilettilikten aıyrylý dárejesi qalaı aıqyndalady
ASTANA. KAZINFORM – Astana qalalyq halyqty áleýmettik qorǵaý salasyndaǵy retteý jáne baqylaý komıtetiniń departament basshysynyń orynbasary Lázzat Sartymbetova kásiptik eńbekke qabilettilikten aıyrylý dárejesi qalaı aıqyndalatynyn túsindirdi.
— Kásiptik eńbekke qabilettilikten aıyrylý men múgedektikti belgileý bir nárse emes. Kásiptik eńbekke qabilettilikten aıyrylý dárejesi óndiristik jaraqat nemese kásiptik aýrý saldarynan naqty qyzmetkerdiń eńbek ne qyzmettik mindetterin oryndaý qabiletiniń qanshalyqty tómendegenin sıpattaıdy. Basqasha aıtqanda, kásiptik eńbekke qabilettilikten aıyrylýdy anyqtaý kezinde tek aýrýdyń bolýy nemese jaraqat saldary ǵana emes, eń aldymen osy saldardyń adamnyń belgili bir kásiptik jumysty oryndaý qabiletine qalaı áser etkeni baǵalanady. Qoldanystaǵy qaǵıdalarǵa sáıkes, kásiptik eńbekke qabilettilikten aıyrylý dárejesi paıyzdyq kórsetkishpen belgilenedi, — dedi ol Astana qalalyq kommýnıkatsııalar qyzmetinde ótken brıfıngte.
Onyń málimetinshe, kásiptik eńbekke qabilettilikten aıyrylý dárejesi 5-29, 30-59, 60-89 jáne 90-100 paıyzben belgilenedi. Saraptama júrgizý kezinde óndiristik jaraqattyń nemese kásiptik aýrýdyń saldary, aǵza fýnktsııalarynyń buzylý deńgeıi, jumysty jalǵastyrý múmkindigi, eńbek jaǵdaılaryn ózgertý, biliktilikti tómendetý nemese arnaıy jumys ornyn qurý qajettiligi eskeriledi. Biraq, dıagnoz kásiptik eńbekke qabilettilikten aıyrylý dárejesi paıyzyn anyqtamaıdy. Demek, birdeı aýrýy bar eki adamnyń kásiptik eńbekke qabilettilikten aıyrylý dárejesi aýrýdyń saldary men atqaratyn jumysynyń sıpatyna baılanysty ártúrli bolýy múmkin.
Lázzat Sartymbetovanyń atap ótýinshe, medıtsınalyq-áleýmettik saraptamaǵa joldamany medıtsınalyq uıym rásimdeıdi. Onda densaýlyq jaǵdaıy, tekserý nátıjeleri, emdeý jáne ońaltý týraly málimetter kórsetilýi tıis. Sonymen qatar medıtsınalyq-áleýmettik saraptama óndiristik jaraqat nemese kásiptik aýrý faktisin anyqtamaıdy. Sarapshylar rastalǵan óndiristik jaǵdaıdyń saldaryn jáne kásiptik eńbekke qabilettiliktiń shektelý dárejesin baǵalaıdy.
Kásiptik eńbekke qabilettilikten aıyrylý dárejesi 6 aıǵa, 1 jylǵa, 2 jylǵa, 5 jylǵa nemese qaıta kýálandyrý merziminsiz belgilenýi múmkin. Merzim densaýlyq jaǵdaıyn, ońaltý boljamyn, emdeý nátıjelerin jáne buzylǵan fýnktsııalardy qalpyna keltirý múmkindigin eskere otyryp anyqtalady. Qaıta kýálandyrý kezinde densaýlyq jaǵdaıynyń dınamıkasy, emdeý men ońaltýdyń tıimdiligi, kásibı shekteýlerdiń saqtalýy jáne eńbekke qabilettilikti qalpyna keltirý múmkindigi baǵalanady. Sondyqtan buryn belgilengen paıyz avtomatty túrde uzartylmaıdy, ár joly saraptamalyq baǵalaý júrgiziledi.
Aıta keteıik, elimizde jasandy ıntellekt áleýmettik tólemderdi taǵaıyndaý, ataýly áleýmettik kómekti rásimdeý jáne múgedektik tobyn belgileý protsesterine keńinen engizilip jatyr.
