Kásiptik bilim berý uıymdaryn teńdestiretin baǵalaý júıesi ázirlendi
ASTANA. KAZINFORM — Búgin Úkimet otyrysynda QR Oqý-aǵartý mınıstri Ǵanı Beısembaev 100 tehnologııalyq kóshbasshyny qalyptastyrýǵa qatysty túsinik berdi.
«Memleket basshysy Qasym-Jomart Kemeluly Qazaqstan halqyna Joldaýynda kásiptik bilimdi reformalaýdyń ekonomıkany damytýdaǵy róline aıryqsha toqtalyp, 2025 jyldy «Jumysshy mamandyqtar jyly» dep jarııalady. Osy oraıda, Memleket basshysynyń tapsyrmasyn oryndaý maqsatynda, álemdegi tendentsııalardy jáne ishki syn- qaterlerdi esepke ala otyryp kásiptik bilim júıesin transformatsııalaýdy kelesi baǵyttarda júrgizbekpiz. Birinshiden, profılızatsııalaý eskerilgen. Buny iske asyrý úshin óńirler ekonomıkasynyń qurylymyna taldaý júrgizildi. Onyń qorytyndysy boıynsha memlekettik organdarmen birlese otyryp, 4 makroóńirdi jáne olardyń damý baǵyttaryn aıqyndadyq. Máselen, elimizdegi jumys kúshiniń úshten birinen astamy shoǵyrlanǵan Qazaqstannyń ońtústik óńirlerinde óndiristerdi lokalızatsııalaý jáne ınfraqurylymdy damytý júrip jatyr. Ortalyq jáne shyǵys oblystarda kadrlardyń salaralyq jáne óńiraralyq aýysýyn qamtamasyz etý úshin odan ári ındýstrııalandyrý josparlanǵan. Soltústik óńirlerde agrarlyq sektor qarqyndy júzege asyrylyp jatsa, batysta – iri kompanııalardyń aınalasynda jańa óndirister qurylyp otyr», - dedi Ǵ. Beısembaev.
Onyń aıtýynsha, osy baǵyttardy eskere otyryp, óńirlerdiń fokýsyn tehnıkalyq jáne kásiptik bilimge baǵyttaý úshin kolledjderdi beıimdeý jumystary bastaldy. Qazirgi kezde óńirlerdiń ekonomıkasy qurylymdaryna sáıkes 195 kolledj qaıta beıimdeldi, olardyń basym bóligi Qyzylorda, Qaraǵandy oblystary men Astana qalasynda ornalasqan.
«Ekinshi baǵyt aıasynda 100 tehnologııalyq kóshbasshyny qalyptastyrý eskerilgen. Bul maqsatta mınıstrlik tehnıkalyq jáne kásiptik bilim berý uıymdaryn teńdestiretin baǵalaý júıesiniń jobasyn ázirledi. Baǵalaý júıesi halyqaralyq tájirıbede, Ekonomıkalyq yntymaqtastyq jáne damý uıymy (EYDU) elderi qoldanatyn reıtıngtik baǵalaýǵa negizdelgen. Osy oraıda, oqytýdyń halyqaralyq salalyq standarttaryn engizý jáne sol standarttar boıynsha sertıfıkattalǵan stýdentterdiń úlesi negizgi kórsetkishterdiń biri sanalady. Jetistikterdi baǵalaýdy jyl saıyn júrgizý tehnıkalyq jáne kásiptik bilim berý uıymdarynyń jeke damý traektorııalaryn derbes qurýyna múmkindik beredi. Baǵalaý júıesi tehnıkalyq jáne kásiptik bilim uıymdaryndaǵy qyzmettiń barlyq parametrlerin baǵalaýǵa jol ashadyi. Osy baǵalaý júıesin qoldaný TjKB-ny 4 topqa, ıaǵnı 4 lıgaǵa bólýge múmkindik beredi. Bul rette birinshi jáne ekinshi lıgaǵa jatqyzylǵan kolledjder alǵashqy 100 tehnologııalyq kóshbasshyny qalyptastyrady. Olar basqa kolledjder úshin Resýrstyq tirek ortalyqtaryn quraıtyn bolady», - dedi mınıstr.
