Kásiporyndar 7 jylda sýdy qaıta paıdalanýǵa kóshýge mindetteledi
ASTANA. KAZINFORM — Jańa Sý kodeksine sáıkes, iri ónerkásip kásiporyndary aldaǵy jeti jyl ishinde aınalymdyq jáne qaıta paıdalanylatyn sý júıelerine kezeń-kezeńimen kóshýi tıis. Talaptardy oryndamaǵandarǵa sý tutyný kólemin qysqartý sharalary qarastyrylǵan.
Bul týraly Sý resýrstary jáne ırrıgatsııa vıtse-mınıstri Talǵat Momyshev aıtyp berdi.
— Endi sý paıdalanýshylar óndiriste paıdalanylǵan sý kólemi, aınalymdyq jáne qaıta paıdalaný kórsetkishteri týraly turaqty túrde esep berip otyrýy kerek. Sonymen birge, olar sý únemdeý tehnologııalaryn engizý, óndiristik emes shyǵyndardy azaıtý jáne sýdy qaıta paıdalaný júıelerine kóshý josparyn ázirleýge mindetti, — dedi T. Momyshev Ortalyq kommýnıkatsııalar qyzmetinde ótken baspasóz máslıhatynda.
Bul baǵytta oblys ákimdikteri 2030 jylǵa deıin ónerkásip oryndarynda sýdy qaıta paıdalaný úlesin arttyrýǵa arnalǵan josparlar qabyldap, tıisti sharalardy iske asyryp jatyr. Nátıjesinde, sýdy qaıta paıdalaný úlesin 28%-ǵa deıin jetkizý kózdelgen.
Al belgilengen talaptardy oryndamaǵan kásiporyndarǵa qatysty qatań sharalar qarastyrylǵan, ıaǵnı, is-sharalar josparyn júzege asyrmaǵan jaǵdaıda, olardyń sý tutyný kólemi 20%-ǵa deıin qysqartylýy múmkin. Qazir osy talaptardy túsindirý maqsatynda ónerkásip kásiporyndarymen kezdesýler ótip júr.
Aıta keteıik, elimizde jylyna 1 mln tekshe metrden astam sý paıdalanatyn shamamen 89 iri ónerkásiptik kásiporyn bar. Olardyń jalpy sý tutyný kólemi 5,8 mlrd tekshe metrdi quraıdy.
Elimizde sý resýrstaryn tıimdi paıdalaný baǵytyndaǵy jumystar kúsheıip keledi. Sý únemdeý tehnologııalary engizilgen egis alqaptarynyń kólemi birneshe ese ósip, 2025 jyly 543 myń gektardan asqan. Bılik 2030 jylǵa qaraı bul kórsetkishti 1,3 mln gektarǵa jetkizýdi kózdep otyr.
