2025 jyldy genderlik teńdik jyly dep jarııalaý usynyldy
ASTANA. KAZINFORM – Qazaqstan Kásipodaqtar federatsııasynyń tóraǵasy Satybaldy Dáýletalın alǵash ret uıymdastyrylǵan eńbekshi áıelderdiń forýmynda genderlik teńdik máselesin kóterdi.
«Genderlik teńdik - jalpyǵa ortaq problema, ony sheshý bárine paıdaly. Kóptegen elde genderlik kemsitýshilikti joıý máselelerimen aınalysatyn memlekettik departamentter nemese teńdik mınıstrlikteri qurylǵan. Kásipodaqtar federatsııasy 2025 jyldy genderlik teńdik jyly dep jarııalaýdy usynady. Kásipodaqtardaǵy áıelderdiń ókildigine kelsek, bastaýysh tóraǵalardyń kópshiligi áıelder. Olardyń deni adamdarmen tikeleı jumys isteıdi, olardyń suraqtaryna jaýap berip, basshymen máselelerdiń naqty sheshimin tabady. Bul múmkin áıelder jaýapty, atqarýshy bolǵandyqtan da shyǵar», - dedi Satybaldy Dáýletalın elordada ótip jatqan Qazaqstan eńbekshi áıelderiniń І forýmynda.
Kásipodaqtar federatsııasy tóraǵasynyń aıtýynsha, áıelder emotsıonaldy bolǵandyqtan jumystaǵy máselelerge beı-jaı qaramaıdy.
«Bizdiń kásipodaqtyń salalyq kásipodaqtary men aýmaqtyq uıymdaryn negizinen er adamdar basqarady, ıaǵnı 23 salalyq kásipodaqtyń tek 4-in áıelder basqarady, al 18 aýmaqtyq uıymdardyń ishinde nebary 5 áıel basshy bar. Kórip otyrǵanyńyzdaı, kásipodaq uıymdarynyń joǵarǵy deńgeılerinde olardyń jalpy múshelik quramdaǵy úlesimen salystyrǵanda proportsıonaldy emes», - deıdi ol.
Qazir elordada «Eńbek salasyndaǵy áıelder: Jańa sheshimder ýaqyty» atty Qazaqstan eńbekshi áıelderiniń І forýmy ótip jatyr. Sharany uıymdastyrýshy – Qazaqstannyń kásipodaqtar federatsııasy.
