Kásipodaq federatsııasy Parlamentke kenshilerdiń quqyǵyn qorǵaıtyn usynys tastady
Kásipodaqtar federatsııasy Parlament Májilisine “Qazaqstan Respýblıkasynyń keıbir zańnamalyq aktilerine áleýmettik qamsyzdandyrý máseleleri boıynsha ózgerister men tolyqtyrýlar engizý týraly” zań jobasyna usynys engizdi, dep habarlaıdy Kazinform.
Kásipodaqtar federatsııasy jerasty jumystaryn isteıtin qyzmetkerlerdiń eńbek jáne áleýmettik quqyqtaryn qorǵaý maqsatynda QR Áleýmettik kodeksine jáne Eńbek kodeksine túzetýler engizýdi usyndy. Tıisti usynystar tizbegin Kásipodaqtar federatsııasy osy Zań jobasy boıynsha jumys tobynyń jetekshisi, Parlament Májilisiniń depýtaty Nartaı Sársenǵalıevtiń atyna joldady.
"Aýyr, zııandy jáne qaýipti eńbek jaǵdaılary bar jerasty jumystarymen (kenshilermen) aınalysatyn Qazaqstan Respýblıkasy azamattarynyń zeınetkerlik jasyn 2024 jylǵy 1 qańtardan bastap – er adamdar úshin – 50 jasqa, áıelder úshin – 45 jasqa deıin tómendetý usynyldy.
Mundaı tásildi Eýrazııalyq ekonomıkalyq odaq elderiniń tájirıbesi kýálandyrady. Mysaly, Reseıde kenshiler (birinshi tizim boıynsha) - er adamdar 50 jasta, al áıelder 45 jasta zeınetke shyǵa alady. Osyǵan uqsas tásil (Reseıdegideı) Mońǵol Halyq Respýblıkasynda qoldanylǵan.
Qazirgi ýaqytta Qazaqstanda jerasty jumystarynda 8 myńǵa jýyq adam jumys isteıdi, onyń ishinde 1500 adam 50 jasqa tolǵan", - dep jazdy Kásipodaq federatsııasynan.
Zań sheńberinde metropolıtendi paıdalaný jónindegi jumystardy qospaǵanda, paıdaly qazbalardy jerasty tásilimen óndirý jumystary, jerasty qurylystaryn salý, paıdalaný jónindegi jumystar jáne kórsetilgen qurylystarda (qurylysy ashyq tásilmen júzege asyrylatyn jerasty qurylystarynan basqa) avarııalyq-qutqarý jumystaryn aıqyndaıtyn “jerasty jumystary” degen jańa uǵymdy engizý usynylady.
Arnaıy kásiptik memlekettik tólemniń mólsherin tıisti qarjy jylyna arnalǵan respýblıkalyq bıýdjet týraly zańda belgilengen eń tómengi kúnkóris deńgeıiniń 2.0-den 10-ǵa deıin ulǵaıtý usynyldy.
QR Eńbek kodeksine Kásipodaqtar federatsııasy usynǵan ózekti túzetýlerdiń ishinde qyzmetkerlerdiń jekelegen sanattary úshin jumys ýaqytynyń qysqartylǵan uzaqtyǵy týraly 69-baptyń 2-1-tarmaǵyn atap ótken jón.
"Osylaısha, kómir kenishterinde jerasty jumystarymen aınalysatyn jumysshylar úshin bes kúndik jumys aptasy bar aýysym boıynsha qysqartylǵan jumys ýaqytyn belgileý usynylady:
– jumysshylar úshin – 6 saǵat (aptasyna 30 saǵat);
– taý-ken sheberleri úshin – 7 saǵat (aptasyna 35 saǵat).
Bul qajettilik 36 saǵattyq jumys ýaqytyn paıdalanbaı-aq, kómir óndirý tehnologııasynyń ereksheligi men naqty jaǵdaılaryna mán berýmen baılanysty.
Qazaqstan Respýblıkasy Kásipodaqtar federatsııasynyń eńbekshilerdiń quqyqtaryn zańnamalyq deńgeıde qorǵaý jumystary jalǵasýda", - delingen aqparatta.
