Kásipqoı fýtbol klýbtarda 100-den asa zań buzýshylyq anyqtaldy – Bektenov
ASTANA. KAZINFORM – 2026 jyldan bastap sheteldik sportshylardy (legıonerlerdi) memlekettik jáne kvazımemlekettik qarajat esebinen qarjylandyrýǵa tyıym salynady. bul týraly Májilis depýtattarynyń saýalyna Premer-mınıstr Oljas Bektenovtiń jaýabynda aıtylǵan.
- Ákimdikter jyl saıyn jergilikti bıýdjetten fýtboldy damytýǵa jáne óńirlerdegi kásipqoı klýbtarǵa qarajat bólip keledi. 2025 jyly fýtboldy damytýǵa 34,9 mlrd teńge kóleminde qarajat qarastyrylǵan. Onyń ishinde 31,8 mlrd teńgesi kásipqoı fýtbol klýbtaryn (Premer-lıga jáne Birinshi lıga klýbtary) qoldaýǵa, al 3,1 mlrd teńge balalar men buqaralyq fýtboldy damytýǵa baǵyttalǵan, - dedi Oljas Bektenov.
Onyń atap ótýinshe, osyǵan oraı 2021-2025 jyldary sportty damytýǵa bólingen bıýdjet qarajatynyń tıimdi jumsalýyn baǵalaý maqsatynda memlekettik aýdıt organdary men óńirlik tekserý komıssııalary tarapynan 12-den astam josparly jáne jospardan tys baqylaý jumystary júrgizildi.
- Bul jumystar aıasynda kásipqoı fýtbol klýbtaryn qamtıtyn basqarmalar men mekemelerdiń qyzmeti qaralyp, 100-den asa zań buzýshylyq (qarjynyń maqsatsyz jumsalýy, artyq tólemder, qaıtalanatyn qyzmetter men tıimsiz josparlaý derekteri) tirkeldi. Sonymen qatar «Aqtóbe» jáne «Qyzyljar» fýtbol klýbtaryna qatysty sybaılas jemqorlyqqa qarsy saraptamalar jasaldy. 2025 jyly «Aqtóbe» fýtbol klýbyna (Aqtóbe oblysy) qatysty oblystyq prokýratýra júrgizgen tekserý nátıjesinde 250 mln teńgeden astam qarjynyń maqsatsyz jumsalǵany (oıynshylarǵa ishki erejelersiz syıaqy men bonýstar tóleý, merdiger uıymdarmen sharttar boıynsha qyzmet baǵasyn arttyrý) anyqtaldy, - dedi ol.
Úkimet basshysy qazirgi tańda sport salasyna bólingen bıýdjet qarajatyn tıimdi paıdalaný maqsatynda «Dene shynyqtyrý jáne sport týraly» QR Zańyna ózgerister engizilip, 2026 jyldan bastap sheteldik sportshylardy (legıonerlerdi) memlekettik jáne kvazımemlekettik qarajat esebinen qarjylandyrýǵa tyıym salynǵanyn atap ótedi.
- Sonymen qatar Týrızm jáne sport mınıstriniń buıryǵymen jergilikti atqarýshy orǵandarǵa kásipqoı klýbtardy jergilikti bıýdjet esebinen qarjylandyrýǵa lımıtter (fýtbolǵa 500 AEK-ten artyq tólenbeýge tıis) qoıylǵan. Osyǵan oraı 2026 jyldan bastap jergilikti atqarýshy organdarǵa kásipqoı fýtboldy damytýǵa bólinetin qarajatqa lımıtter qoıylyp, fýtbolǵa jeke ınvestorlardy tartý jaıynda jumystar júrgizý tapsyrylǵan, - dedi Premer-mınıstr.
Buǵan deıin otandyq fýtbol klýbtaryn satyp alýǵa nıetti kásipkerler belgili bolǵanyn jazǵan edik.
Aıta keteıik, osy jyldyń naýryzynda Býrabaıda ótken Ulttyq quryltaıdyń 4-otyrysynda Memleket basshysy fýtbol klýbtary oblystyq bıýdjetterge ǵana arqa súıemeı, shetelderdegi sekildi ózderi de tabys tabýdy úırenýi kerektigin aıtqan edi.
Osydan keıin Týrızm jáne sport mınıstrligi otandyq fýtbol klýbtaryn jekeshelendirý boıynsha keshendi jol kartasy ázirledi.